Газада түрік қорының қолдауымен орта мектеп ашылды

АСТАНА. KAZINFORM — Израильдің шабуылынан секторда 20 мыңнан астам оқушы мен 1200-ден астам білім беру қызметкері қаза тауып, оқу орындарының 92%-ы қирады. Бұл туралы Анадолы агенттігі жазды.

Газа секторында Адам құқықтары мен бостандықтары (IHH) гуманитарлық көмек қорының қолдауымен салынған ағаш мектеп ғимаратының салтанатты ашылу рәсімі өтті.

Шараға Газа секторының орта және жоғары білім министрінің орынбасары Махмуд Матар, Газа мэрі Яхья ас-Серрадж, Газадағы IHH өкілі Эшреф Джарраде, IHH жобасының директоры Ала Абу Хашим, сондай-ақ ресми және жергілікті билік өкілдері мен ата-аналар қатысты.

Министрдің орынбасары Махмуд Матар жаңа мектеп қазіргі жағдайда «үміт сәулесі» болғанын айтты.

Ол Израиль шабуылдарының салдарынан 20 мыңнан астам студент пен 1200-ден астам білім беру қызметкерінің қаза тапқанын, мектептердің 92 пайызы зардап шеккенін атап өтті. Сондай-ақ Газада білім жүйесін қалпына келтіру үшін кем дегенде 5 жыл қажет екенін айтты.

Газа мэрі де Түркияның қолдауы үшін алғыс айтып, мектептің Газаның солтүстігіндегі қираған аймақтардағы білімнің жандануына үлес қосатынын жеткізді.

Жоба директоры Әбу Хашим бұл мектептің Газаның солтүстігінде толығымен ағаштан салынған алғашқы мектеп екенін айтты.

Абу Хашим бұл жобаның Палестина халқы алдындағы гуманитарлық және моральдық жауапкершілік аясында жүзеге асырылғанын, бұл Түркияның қолдауымен жүзеге асырылатын білім беру жобаларының бастамасы екенін атап өтті.

Сегіз кабинеттен тұратын мектеп шамамен 1200 оқушыға арналған.

Айта кетейік, Египет пен Газа секторы арасындағы Рафах өткелі сынақ режимінде ашылады.