Ғылым министрлігі ел өңірлеріне қандай мамандар қажет екенін көрсететін карталар әзірледі

АСТАНА. KAZINFORM – ҚР Ғылым және жоғары білім министрлігі кадрларға қажеттілік бойынша өңірлік карталар әзірлеп шығарды.

2022 жылдан бері елімізде кадр даярлауға бағытталған «Мамандығым – болашағым» жобасы іске асырылып келеді. Жоба Қазақстандағы өңірлік еңбек нарығының өзекті сұранысын ескеріп, кадр даярлау жүйесін қайта форматтауды көздейді.

− Жобаның негізгі міндеттері – экономикалық дамудағы өңірлік теңгерімсіздікті теңестіру, өңірлердегі мемлекет, кәсіпорындар, білім беру ұйымдары, жастар, ата-аналар үшін еңбек нарығы және білім туралы ақпаратқа қол жеткізу және өңірлік бөліністе еңбек өнімділігі мен халықтың табысын арттыру. Осы бастаманы үйлестіру және тиімді іске асыру мақсатында «Мамандығым – болашағым» республикалық жобалық кеңсесі құрылды, - деді «Мамандығым – Болашағым» кеңсесінің басшысы Олжас Сәкенов Орталық коммуникациялар қызметінде өткен брифингте.

Спикердің айтуынша, еліміздің 91 ЖОО-сында жаңа кәсіптердің салалық атластары мен өңірлік карталар негізінде 902 білім беру бағдарламасы әзірленді. Колледждерде 45 білім беру бағдарламасы апробациядан өтіп жатыр.

− 9 өңірде – Павлодар, Маңғыстау, Қарағанды, Алматы, Ақтөбе, Жетісу, Ақмола, Жамбыл облыстары мен Астана, Алматы қалаларында кадрларға қажеттілік бойынша өңірлік карталар әзірленді. Өңірлік карталарды әзірлеу қорытындысы бойынша 473 мамандық анықталды. Еdunavigator.kz платформасында 100 мыңға жуық оқушы кәсіби диагностикадан өтті, − деді О.Сәкенов.

Мәселен, Павлодар облысында 9 сала, 40 перспективалы мамандық, Маңғыстауда 3 сала, 39 перспективалы мамандық, Қарағанды облысында 5 сала, 58 перспективалы мамандық анықталған.

Астанада 4 сала, 17 перспективалы ТжКБ кәсіптері; Алматы қаласында 6 сала, 114 перспективалы кәсіп бар.

Ақтөбе облысында 43, Жетісу облысында 66, Ақмола облысында 36, Жамбыл облысында 68 перспективалы мамандық бар.

Биыл 5 өңірде жоспарлы нысаналы қаржыландыру арқылы, 6 өңірде – жергілікті бюджет есебінен «Қазақстан өңірлерінің жаңа кәсіптері мен құзыреттерінің атластары» әзірленіп жатыр.

Бұған дейін жасанды интеллект әсерінен қандай мамандықтар жойылып кетуі мүмкін екенін жазған болатынбыз.

Сондай-ақ, Президент тапсырмасына сәйкес және Жұмысшы мамандықтары жылы аясында еліміздің орта білім беру ұйымдарында педагог-кәсіптік бағдар беруші лауазымы ресми түрде бекітілді.