Грузияның экс-президенті Михаил Саакашвили 9 жылға сотталды
АСТАНА. KAZINFORM — Тбилиси қалалық соты бұрынғы президент Михаил Саакашвилиді 9 млн лари (шамамен 3,2 млн доллар) көлеміндегі бюджет қаражатын жымқырды деген айыппен 9 жылға бас бостандығынан айырды, деп хабарлайды грузиндік БАҚ.
Бұл ретте әңгіме 2009-2013 жылдары 8,8 млн астам лари көлеміндегі қаржыны жымқыру туралы болып отыр. Бұл іс Грузияда «пенжектер ісі» атауымен белгілі. Саакашвилиге айып 2014 жылы тағылған.
Айыптау тарапы атап өткендей, бұл сомаға Саакашвилидің люкс қонақүйлер мен курорттардағы демалысы, косметологиялық емханаларға баруы және киімге жұмсалған шығындары кіреді. Сондай-ақ аталмыш тізімде Лондонда 28 600 долларға сатып алынған жеті пенжак пен кашемирден тігілген спорттық пальто, сондай-ақ құны 4 600 доллар қолдан тігілген екі костюм бар.
Сот іс бойынша екінші айыпталушы — Мемлекеттік күзет қызметінің бұрынғы басшысы Теймураз Джанашияны қызметтік өкілеттігін асыра пайдаланды деп танылып, оған 300 мың лари (107 мың доллар) көлемінде айыппұл салынды.
Саакашвили мен Джанашия сот үкімі жарияланған кезде сотта болмаған, олар өздерін тағылған айып бойынша кінәлі емес деп санайды.
Еске сала кетсек, бұл Михаил Саакашвилиге шығарылған үшінші үкім. Бұрынғы саясаткер шекараны заңсыз кесіп өткені және 2007 жылғы қарашада оппозиция митингісін таратқаны үшін сот процестері әлі де жалғастып жатыр. Ол сырттай алты жылға бас бостандығынан айырылды.
Бірнеше үкім шығарылған жағдайда Грузияда жазаны сіңіру қағидаты қолданылады. Экс-саясаткер түрмеде қамауға алынған сәттен бастап — 2021 жылдың 1 қазанынан бері отыр, сәйкесінше ол 2030 жылдың 1 қазанында босатылуы мүмкін.
Бұған дейін Грузиядағы саяси жағдай қалай дамығанын жазған болатынбыз.
