Хоккей: «Барыс» елордада «Авангардтан» басым түсті
НҰР-СҰЛТАН. ҚазАқпарат - Елордалық «Барыс» Құрлықтық хоккей лигасындағы кезекті ойынын елордада Ресейдің «Авангард» (Омбы) клубына қарсы өткізді, деп хабарлайды ҚазАқпарат тілшісі.
Бүгінгі кездесуді елордалық хоккейшілер белсенді бастады. Қарсыластар қақпасы маңында шабуыл ұйымдастырып, есеп ашуға ұмтылды.
Ойынның 17-минутта «Барыс» хоккейшісі Ансар Шайхмедденов есеп ашса, 35-минутта Энтони Луис есепті үстемелей түсті.
Бұдан кейін «Авангард» сапынан Владимир Ткачёв 39-минутта мергендік танытты.
Үшінші кезеңде елордалық командадан Иван Мищенко 43, Лиден Вей 44-минуттарда басымдықты арттыра түсті.
Ресейлік командадан Сергей Толчинский 45, Владимир Брюквин 50-минуттарда көздеген нысанадан мүлт кеткен жоқ.
Ойынның 58-минутында Энтони Луис өзінің екінші шайбасын соқты. Нәтижесінде елоралық клуб қарсыласынан 5:3 есебімен басым түсті.
Айта кетсек, енді «Барыс» 16 қыркүйекте «Авангардпен» тағы бір мәрте ойын өткізеді.
Еске салсақ, бұдан бұрын «Барыс» елордада «Трактор» командасынан басым түсті.
Сондай-ақ, елордалық клуб оған дейін төрт ойында қарсыластарына есе жіберіп қойды.
Фото: sports.kz
