Хоккей: Қазақстан қыздар құрамасы алғашқы ұпайды еншіледі
НҰР-СҰЛТАН. ҚазАқпарат - Қытай астанасы - Бейжің қаласында шайбалы хоккейден қыздар арасында Әлем чемпионатының бірінші дивизионы В тобындағы үшінші тур ойындары өтті. Қазақстан құрамасы Латвиямен кездесті, деп хабарлайды ҚазАқпарат тілшісі.
Аталмыш додада Қазақстан құрамасы сәтсіз ойын көрсетіп келеді. Бұған дейінгі екі кездесуде де қарсыластарына есе жіберді. Алдымен Польшадан 3:5 есебімен жеңіліп қалған еді. Одан кейін Голландияға 1:3 есебімен жол берді.
Бүгінгі кездесуде де жеңіске жете алған жоқ. Ойынның негізгі кезеңі 1:1 есебімен тең аяқталды. Латыштар сапынан 3-минутта Лева Петерсон шайба соқса, оған 10-минутта қазақстандық Малика Алдабергенова бір шайбамен жауап берді. Ойын соңына дейін осы есеп өзгерген жоқ. Овертаймда да жеңімпаз анықталмады. Буллитте Латвияның жолы болды.
Айта кетейік, бүгін В тобында тағы екі ойын өтті. Голландия Қытайды 4:0 есебімен тізе бүктірсе, Оңтүстік Корея Польшадан 4:3 есебімен басым түсті.
Аталмыш топта тоғыз ұпаймен Голландия көш бастап тұр. Одан кейінгі орындардағы Польша мен Қытайдың еншісінде алты-алты ұпайдан бар. Ал Оңтүстік Корея, Латвия 2 ұпай еншілеген. Әзірге Қазақстан қоржынында - 1 ұпай.
Төртінші тур ойындары 10 сәуірде өтеді. Бұл күні Латвия мен Голландия, Қытай мен Польша, Қазақстан мен Оңтүстік Корея кездеседі.
