Иран Трамптың ядролық келіссөздер туралы хатын алды
АСТАНА. KAZINFORM - Иранның рухани көсемі Әли Хаменеи бұған аса қызығушылық танытпайтынын білдірді.
Тегеран АҚШ президенті Дональд Трамптан Иранның ядролық бағдарламасы бойынша келіссөз жүргізуді сұраған ресми хат алды. Хатты сәрсенбі күні кешке Тегеранға келген Біріккен Араб Әмірліктері президентінің дипломатиялық кеңесшісі Анвар Гаргаш Иран Сыртқы істер министрі Аббас Аракчиге тапсырды.
Аракчи сәрсенбі күні кешке Тегерандағы Иран Сыртқы істер министрлігінде Гаргашты қабылдағаннан кейін бірнеше сағат өткен соң өзінің Instagram парақшасында хатты алғанын растады, деп хабарлайды IRNA.
Айта кетейік, 7 наурызда Трамп Fox Business Network арнасына берген сұхбатында Иран көшбасшысы Әли Хаменеиге хат жолдағанын айтқан болатын.
- Келіссөз жүргізуге келісесіз деп үміттенемін, өйткені әскери жолмен соғысуымыз керек болса, бұның салдары өте ауыр болады, - деді Трамп.
Бірер күн бұрын Иран Сыртқы істер министрі Аббас Аракчи Трамптың хатын араб мемлекетінің арнайы өкілі жақын күндері жеткізетінін айтқан болатын. Ал Иранның рухани көсемі аятолла Әли Хаменеи сәрсенбі күні АҚШ-пен келіссөздер жүргізуден бас тартты. Хаменеи университет студенттері алдында сөйлеген сөзінде Трамптың келіссөздер туралы ұсынысын «алдау» деп бағалады.
– Біз бұлардың келіссөз ережесін орындамайтынын біліп тұрсақ, келіссөздің не керегі бар? Сондықтан келіссөзге шақыру... қоғамдық пікір арқылы алдау, деп хабарлайды ирандық БАҚ Хаменеидің сөзін.
Аятолла шамадан тыс талаптар қойып отырған Трамп әкімшілігімен келіссөздер «санкциялар түйінін қатайтып, Иранға қысымды күшейтетінін» айтты.
2018 жылы Трамп АҚШ-ты Иранның ядролық бағдарламасына қатысты «Ядролық келісім» деп аталатын ортақ жан-жақты іс-қимыл жоспарынан (JCPOA) алып тастап, Иран экономикасын әлсірететін санкцияларды қайта енгізді.
2019 жылы Трамп аятолла Хаменеимен тікелей келіссөздер жүргізуге тырысып, Жапония премьер-министрі Синдзо Абэні арашалауға шақырды. Бұдан кейін Иранның жоғарғы жетекшісі де бұл ұсынысты ашық түрде қабылдамады және «Трамп хабарлама алмасатын адам емес» деді.
Хаменеи сондай-ақ Иранға келетін кез келген әскери соққыдан сақтануға назар аударды.
- Иран соғыс іздемейді, бірақ америкалықтар немесе олардың агенттері қате қадам жасаса, біздің жауабымыз шешуші әрі нақты болады және Америка көп зардап шегеді, - деді.
– Егер біз ядролық қару жасағымыз келсе, АҚШ оған тосқауыл бола алмас еді. Біз мұны өзіміз қаламаймыз, - деді аятолла.
8 наурызда Хаменеи АҚШ мәселелерді келіссөздер арқылы шешкісі келмейтінін, бірақ өз талаптарын қойып, үстемдік орнатқысы келетінін айтып, Иранның бұған келіспейтінін атап өтті.
Ал Қытай, Иран және Ресей Сыртқы істер министрліктерінің өкілдері жақын арада Бейжіңде Иранның ядролық мәселесін талқылайды.
