Исландияда жанартау атқылаған Гриндавик қаласы бұрынғыдай болмайды

АСТАНА. KAZINFORM - Қорғаныс құрылымдары мен құтқарушылар тәулік бойы жүргізген жұмыстың арқасында ауқымды қираулар болған жоқ. Исландия үкіметі отырыс өткізіп, қаладағы жағдайды талқылады, деп хабарлайды Еuronews.

Исландиядағы Гриндавик қаласын талқандаған лава ағыны баяулады, бірақ ол әлі де қауіп төндіріп тұр.

Исландияның метеорологиялық басқармасының мәлімдеуінше, Рейкьянес түбегінде «жанартау атқылауы қанша уақытқа созылатынын болжау қиын».

Жергілікті тұрғындар алдын ала эвакуацияланды. Қаза болғандар мен зардап шеккендер жоқ. Жанартау атқылауы салдарынан пайда болған жарыққа құлап кеткен жұмысшы із-түзсіз жоғалды.

Қалған лава ағынының көп бөлігі қазір қорғаныс тосқауылдары бойымен оңтүстік-батысқа бағытталып, оның траекториясы тұрақтанған сияқты.

Дүйсенбіде үкімет отырысы өтті. Елдің Әділет министрі Гудрун Хафстейнсдоттир мәлім еткендей, бұл қала ешқашан бұрынғыдай болмайды, ал тұрғындары оған алдағы айларда орала алмайды.

«Болашақта не болатынын болжау өте қиын. Бірақ мен оптимист боламын. Гриндавикте елді мекен болады, бірақ ол басқаша болады. Өкінішке қарай, Гриндавик бұрынғыдай болмайды», — деді ол.

Табиғи апат құтқарушылардың тәулік бойы жұмыс істеуінің арқасында ауыздықталды. Желтоқсан айында жанартау атқылауынан кейін салынған қорғаныс лаваны ішінара ұстап қалды, бірақ кейбіреулері екі жарықшақ ашылғаннан кейін бұзылды.

Сарапшылардың пікірінше, соңғы атқылау ауаға көп мөлшерде күл шығармайды. Кефлавик халықаралық әуежайындағы жұмыс қалыпты режимде жалғасуда.

Еске сала кетсек, бұған дейін Исландияда ірі жанартау атқылай бастағаны туралы жазған едік.