Із-түзсіз кеткен ақтөбелік бір айдан кейін табылды
АҚТӨБЕ. ҚазАқпарат - Ақтөбе қаласының тұрғыны Батырхан Ғалиақбаров үйінен шығып кетіп, 1 айға жуық уақыт хабарсыз кеткен. Полиция 24 жастағы жігітті Хромтау ауданынан тапты, деп хабарлайды ҚазАқпарат тілшісі.
Отан алдындағы борышын өтеп, үйіне оралған Батырхан Ғалиақбаров 16 қыркүйек күні үйінен шығып кетіп, қайта оралмаған. Ұялы телефоны мен керек-жарағын түгел тастап кеткен. Арада 3 күн өткен соң туған-туыстары полицияға арыз жазып, іздеу жарияланды. Бұған дейін хабарлағанымыздай, Батырхан Ғалиақбаров әскери борышын өтеп жүрген кезде басынан жарақат алған .
«Жоғалған жігіт Хромтау ауданынан табылды. Полиция қызметкерлері жігітті ата-анасына тапсырды»,- деп хабарлады Ақтөбе облыстық ІІД баспасөз қызметі. Белгілі болғаны, жас жігіт ауданға жұмыс істеуге кеткен. Полиция қызметкерлері оны жұмыста жүрген жерінен тауып алды.
