Израильдің әуе соққысы салдарынан Ливанның шығысында кемінде 10 адам қаза тапты
АСТАНА. KAZINFORM — Израиль әскери-әуе күштерінің Ливанның шығысындағы Баальбек қаласына жақын орналасқан Рияк елді мекеніне жасаған әуе соққысы салдарынан, алдын ала мәлімет бойынша, кемінде 10 адам қаза тауып, тағы 30 адам жарақат алды. Бұл туралы Анадолу жазды.
Ливанның National News Agency (NNA) ақпарат агенттігінің хабарлауынша, израильдік жойғыш ұшақтар Баальбек маңындағы Қаср-Наба және Тамнин әт-Тахта елді мекендерінің жазық аймақтарына екі рет соққы жасаған.
Агенттік мәліметінше, Рияк елді мекенінде әуе соққысы салдарынан тас жол бойында орналасқан, «Әл-Кард әл-Хасан» қаржы мекемесінің жанындағы ғимарат толықтай қираған. Бұл мекеме Хезболла қозғалысына жақын деп саналады.
Сол дереккөзге сәйкес, Израиль авиациясы Ливанның шығысындағы таулар етегінде орналасқан Махалля аш-Шара ауданына да үш рет соққы жасаған.
Рияк елді мекеніндегі ғимаратқа жасалған шабуыл салдарынан кемінде 10 адам қаза тауып, тағы 30 адам жараланған.
Өз кезегінде Израиль армиясы Баальбек ауданындағы соққының нысанасы «Хезболлаға» тиесілі және оның мүшелері Израиль мен Израиль армиясына қарсы әрекеттерді жоспарлау үшін пайдаланған «штаб» болғанын мәлімдеді.
Бұған дейін кешке Израиль әскери-әуе күштері Ливанның оңтүстігіндегі Сайда қаласына жақын орналасқан Айн әл-Хильва палестиналық босқындар лагеріне де соққы жасаған. Осы шабуыл салдарынан 2 адам қаза тауып, тағы үшеуі жарақат алған.
Сондай-ақ Израиль авиациясы Ливанның оңтүстігіндегі Ансар мен Зарария елді мекендерінің арасындағы аумаққа, сондай-ақ Серире мен Баруз елді мекендері маңындағы Литани өзенінің арнасына бірнеше соққы жасады.
