Қадір түні: Нұрлан имам Jibek joly телеарнасында тікелей эфир өткізеді

АСТАНА. KAZINFORM — Jibek joly телеарнасында «Жүрек сөзі» бағдарламасының Қадір түніне арналған шығарылымы тікелей эфирде көрсетіледі.

Нұрлан Байжігітұлы (Нұрлан имам) жүргізетін «Жүрек сөзі» бағдарламасы әр сәрсенбі сайын 11:10–да Jibek joly телеарнасында көрсетіліп келеді. Онда адамгершілік, имандылық, үлкен мен кішінің сыйластығы, ізет-инабаты тәрізді маңызды мәселелер талқыланады. Бүгінгі арнайы шығарылым «Қайыры мол Қадір түні» деп аталады.

— Рамазан айының қасиетті болуының ерекшеліктерінің бірі — Қадір түнінде тағдырдың жазылуы. Мың айдан да қайырлы саналатын бұл ерекше түнді қалай қарсы алу керек? Қандай амалдар жасаған жөн? Бүгін 23:00–де тікелей эфирде Нұрлан имаммен «Жүрек сөзі» бағдарламасын өткізіп алмаңыз, — деп жазылған Jibek joly телеарнасының Instagram парақшасында.

Тікелей эфир сағат 23:00–ден 00:00–ге дейін өтеді. Онда көрермендер 8-717-295-4074 байланыс нөмірі немесе экрандағы QR-код арқылы Ораза, Қадір түніне байланысты өз сауалдарын жолдай алады.

Еске сала кетсек, бүгін 26 наурыздан 27 наурызға қараған түн — Қадір түні. Қадір кешінің уақыты күн батқаннан сәресіге дейін жалғасады. Бұл түннің ғибадаттарын мұсылмандар мешіттерде де, өз үйлерінде де атқара алады. 

Сондай-ақ, Kazinform агенттігі Рамазан айына қатысты негізгі ұстанымдарды көпшілік назарына ұсынған еді.