Қала көшелері дұрыс тазаланбайды – Орал әкімдігі жауап берді
ОРАЛ. KAZINFORM – Орал қаласында тұрғындардың көшелерді шаң, балшық пен қардан тазалауға қатысты шағымы жыл сайын көбеюде. Бұл туралы заңгер, БҚО қоғамдық кеңесінің мүшесі Бауыржан Ахметжан Фейсбук әлеуметтік желісіндегі парақшасында мәлім етті.
Оның айтуынша, қаланы кемінде үш ауданға бөліп, «Жайық Таза қала» ЖШС-ның монополиясын азайтып, бәсекелес компаниялармен қызметтің сапасын көтеру – басты мәселе.
«Мысалы, былтыр 22 қарашада қалаға күтпеген жерден қыс келіп, қарлы боран бәрін састырды. Биыл 5 қарашада дәл сондай коллапс қайталанып, әдеттегідей «Жайық Таза қала» ЖШС бұған тағы да дайын болмады. Соңғы тоғыз жылда Оралда көше-жол желісін күтіп ұстау және қаланы санитарлық тазалау жұмыстарын (көшені жуу, сыпыру, жолды жазда, қыста тазалау, қар жинау және басқа) тек қана бір компания-монополист, БҚО мәслихатының депутаты Тұрарбек Тілемісовке тиесілі «Жайық Таза қала» ЖШС атқарып келеді», дейді БҚО қоғамдық кеңесінің мүшесі.
Оның сөзіне қарағанда, goszakup.gov.kz мәліметіне сәйкес «Жайық Таза қала» ЖШС жолды күтіп ұстау және тазалау үшін 2016-2024 жылдары бюджеттен 25,4 млрд теңгеге келісім-шартқа отырған. Мемлекеттік мекемелермен келісілген 111 шарттың 66-сы бір көзден жасалған. Мысалы, негізгі тапсырыс беруші Орал қаласы тұрғын үй-коммуналдық шаруашылық бөлімі аталмыш мекемемен 2023 жылы 7,4 млрд теңгеге үш шарт жасаған, мұның мерзімі биылғы 31 желтоқсанда аяқталады. Биыл 1,1 млрд теңгеге осы «Жайық Таза қала» ЖШС-мен Зачаган және Круглоозерный әкімдіктері және басқалар келісімге отырған.
«Сонымен, «Жайық Таза қала» тапсырыс берушілердің «ең сүйікті» мердігері ме? Әлде басқалар бұны жасай алмайды ма? Ал, монополист болғанның бір жаманы - өзімшілдік пен жұмыстың сапасын көтеруге ынтаның болмауы. Егер мекеме қожайыны 9 жылдан бері депутат болса, 9 жыл бойы компаниясы тендерді алып отырса, басқа бизнесті әкімдік дамытпаса, қалай ынта болады? Менің ойымша, қаланы бірнеше бөлікке бөліп, оны мердігердің аумағы етіп бекіту тазалықтың кепілі әрі қоғамдық бақылау жүргізуге ыңғайлы. Бірнеше мердігердің облыс орталығын тазалауы бәсекелестік пен қызметтің сапасын арттыратыны сөзсіз», дейді Б.Ахметжан.
Осы мәселеге байланысты Kazinform тілшісінің сауалдарына Орал қаласы әкімдігі жауап берді.
Әкімдік бәсекелестік ортаны арттыру мақсатында «Жайық Таза қала» ЖШС-ның 2018 жылы толығымен жеке меншік иесіне сатылғанын, құрылтайшысы Т.Тілемісов екендігін жеткізді.
Әкімдік мәліметіне қарағанда, кәсіпорын жол-көпір шаруашылығын күтіп ұстау, орталықтандырылған санитарлық тазалау, аялдама павильондарын жуу, қисық сызықты қоршауларды орнату, дәнекерлеу, арықтар мен су өткізетін құбырларды тазалау, ағаш кесу, гүл егу, суару, су тасқынының алдын алу жұмыстарын жүргізеді.
Кәсіпорынның балансында әкімшілік ғимараттары, машиналар мен механизмдерді жөндеуге және қызмет көрсетуге арналған бокстары, техниканың тұруына арналған қойма үй-жайлары мен аумақтары бар. Коммуналдық және жол техникасының жалпы саны – 218.
«Орал қаласының көше-жол желісін күтіп ұстау және қаланы санитарлық тазалау жұмыстарын атқаратын мердігерді анықтау мақсатында мемлекеттік сатып алу порталына хабарлама беріліп, техникалық талаптар қойылады. Конкурстың қорытындысына сәйкес «Жайық Таза қала» ЖШС мекемесімен 2016 жылдан бері жалпы 24,5 млрд теңгеге келісім-шарт жасалды. Бұл жерде атап өтетін жайт, қаламызда техникалық талаптарға сәйкес келетін, көрсетілген жұмысты атқаруға әлеуеті жеткілікті мекеме аз немесе конкурсқа қатыспайды. Сондықтан 8 жылдан бері көше-жол желісін күтіп ұстау және қаланы санитарлық тазалау жұмыстарын тек бір кәсіпорын «Жайық Таза қала» ЖШС атқаруда. Қолданыстағы заңнамада көрсетілген автомобиль жолдарын жөндеу мен күтіп-ұстауды қаржыландыру нормативтеріне сәйкес, Орал қаласының автомобиль жолдарын күтіп-ұстау үшін бір жылға 7 млрд қаражат қажет. Алайда мердігер мекемеге аталған жұмысты орындау үшін бюджеттен мұндай қаражат бөлінбейтінін атап өткен жөн», делінген әкімдік жауабында.
Орал қаласы әкімдігі қар жауған кезде алдымен магистральдық көшелер, содан кейін басқалары тазаланатынын еске салды.
Қала аумағының үлкеюіне байланысты 2019 жылдан бастап қалаға қарасты Зачаган, Деркөл, Круглоозерный, Желаев кенттерінде көше-жол желісін күтіп ұстау және қаланы санитарлық тазалау жұмыстарын жүргізу мақсатында бөлек конкурстар жарияланды. Одан бөлек, 2024 жылдан бастап бұрын санитарлық тазалауда болған ағаштарды күтіп-ұстауға арналған жұмыстарға бөлек конкурстар өткізіліп, Зачаганда «Тәуекел» ЖШС және Деркөл кентінде «Белый Парус» ЖШС жеңімпаз атанды.
«2023-2024 жылға қала аумағын күтіп ұстауды қамтамасыз ету шарты аяқталады. Соған байланысты 2025-2026 жылдарға берілетін байқауда Орал қаласының көше-жол желісін күтіп ұстау және қаланы санитарлық тазалау жұмыстарының ішінен шаһар аумағында ірі көлемді қалдықтарды жинау және шығару жұмыстары бөлек шығарылып, 6 бөлікке бөлінуде. Сәйкесінше 6 мердігер қала аумағында ірі көлемді қалдықтардан тазартатын болады», деп түйіндеді қала әкімдігі.
Еске сала кетейік, бұдан бұрын Орал қаласында көше жолдары қардан қалай тазартылмақшы екендігін жазған болатынбыз.
