Калифорниядағы өрт 34 мың гектар жерді шарпыды

АСТАНА. KAZINFORM — АҚШ-тың Калифорния штатындағы Сан-Луис-Обиспо мен Риверсайд округтері де кіретін бірнеше аймақта тұтанған орман өрті шамамен 34 мың гектар жерді шарпыды, деп жазады Anadolu. 

Калифорнияның Орман шаруашылығы және өртпен күрес департаменті (Cal Fire) ресми сайтында жарияланған мәліметке сәйкес, 2 шілдеде Сан-Луис-Обиспо округінде басталған Madre өртінің аумағы шамамен 32 мың гектарға жеткен. Қазіргі уақытта өрт ошағының 35 пайызы бақылауға алынған.

Ал Риверсайд округінде 29 маусымда тұтанған өрт шамамен 1 000 гектар аумақты шарпыған. Бұл өрттің 95 пайызы ауыздықталғаны хабарланды.

Сонымен қатар Риверсайдтан тыс орналасқан Сискию мен Шаста округтеріндегі Green, Butler және Marble Complex өрттері жалпы 674 гектар жерге таралған.

Бұл үшеуінің ішінде тек Marble Complex өртінің 5 пайызы ғана бақылауға алынған, қалған ошақтар әлі де таралып жатыр.

Айта кетейік, Техастағы су тасқынынан қаза тапқандар саны 100-ден асты, оның ішінде 28 бала бар.