Камчаткадағы жер сілкінісі әртүрлі елдерде цунами қаупін тудырды
АСТАНА. KAZINFORM — Камчаткада соңғы онжылдықтағы ең күшті жер сілкінісі Тынық мұхиты аймағында цунами қаупі туралы ескерту толқынын тудырды, деп хабарлайды ТАСС.
АҚШ және Канада
Камчаткадағы жер сілкінісінен кейін АҚШ-тың Гавайи жағалауында цунами болды. Осыған байланысты штаттағы сауда айлақтары жабылды. Американың Hawaiian Airlines және Alaska Airlines әуе компаниялары рейстерін тоқтатты. АҚШ Ұлттық мұхит және атмосфералық зерттеулер басқармасының (NOAA) мәліметінше, Халеива қаласында қалыпты теңіз деңгейінен 1,2 м биіктікке дейінгі толқындар тіркелген. Цунами туралы ескерту АҚШ пен Канаданың бүкіл батыс жағалауында, соның ішінде Калифорния, Орегон, Вашингтон, Британдық Колумбия және Аляска үшін жарияланды.
Мексика және Перу
Мексика Әскери-теңіз күштерінің цунами туралы ескерту орталығы республиканың батыс жағалауында цунами қаупі туралы ескерту жасады. Орталықтың мәліметінше, толқындар биіктігі 1 метрге жетуі мүмкін. Цунами қаупі Перудің бүкіл жағалауында бар, деп хабарлады Оңтүстік Американың Әскери-теңіз күштерінің гидрография және навигация басқармасы.
Азия
Филиппин билігі тұрғындарын елдің жағалауындағы аудандарда биіктігі шамамен бір метр болатын толқындар туралы ескертті. Билік кейбір аудандардың тұрғындарына қырағы болуға және жағалау сызығына жақындамауға кеңес берді. Индонезия билігі Камчаткадағы жер сілкінісі арал мемлекетінің бірнеше бөлігінде биіктігі 50 см болатын толқындарды тудыруы мүмкін деп ескертті. Қытайдың шығысындағы Чжэцзян провинциясы мен Шанхай аймағында цунами қаупі туралы ескерту жарияланды. Жапонияның Чиба префектурасында бірнеше кит жағаға шықты.
Жер сілкінісі болжанған оқиға болды
Камчаткадағы жер сілкінісі соңғы 30 жылда болжанған оқиға болды. Бұл туралы Ресей ғылым академиясының О. Ю. Шмидт атындағы Жер физикасы институтының директоры Сергей Тихоцкий мәлімдеді.
— Бұл соңғы 30 жылдағы ең болжанған оқиға болды. Өйткені, бізде бұл салада міндетті түрде күшті оқиға болады деген ұзақ мерзімді болжам бар еді, ал Камчаткада соған дайындалды, ғимараттарды нығайту шаралары қолға алынды, тұтас бағдарлама жасалды, — деді ол.
Бұған дейін Камчатка өлкесінде 1952 жылдан бергі ең күшті жер сілкінісі болды, магнитудасы әртүрлі бағалау бойынша 8,7-ге жеткен. Северо-Курильск жағалауында цунами болды. Курил аралдарынан 2,7 мыңға жуық адам эвакуацияланды. Облыста аймақтық штаб ашылып, тұрғындар үшін сенім телефоны ұйымдастырылды.
Сауалнама қорытындылары бойынша Камчатка өлкесіндегі жер сілкінісі салдарынан қаза болғандар мен ауыр зардап шеккендер жоқ. Камчатка өлкесінің билігі емдеу мекемелерінің жұмысын күшейтілген режімге ауыстырды.
АҚШ Геологиялық қызметі Камчаткадағы жер сілкінісі 2011 жылдан бергі ең күшті табиғи апат және 1900 жылдан бері әлемдегі ең күшті 10 жер сілкінісінің бірі болғанын хабарлады.
Айта кетелік Трамп Аляска, Гавай аралдары және АҚШ-тың Тынық мұхиты жағалауында цунами қаупі бар екенін ескертті.
