«Қапшағай өңірінің газ желілері» бәсекелестік заңнамасын бұзғаны анықталды

АСТАНА. KAZINFORM —  Бәсекелестікті қорғау және дамыту агенттігінің Алматы облысы бойынша департаменті жүргізілген талдау және Алматы облысының прокуратурасы ұсынған ақпарат негізінде «Қапшағай өңірінің газ желілері» ЖШС-нің әрекеттерінен бәсекелестікті қорғау туралы заңнаманы бұзу белгілерін анықтады. 

— ЖШС коммуналдық-тұрмыстық және өнеркәсіптік тұтынушылармен тауарлық газды бөлшек саудада өткізу шарттарын жасасу кезінде ай соңында газды толық алмау немесе тұтынудан бас тарту жағдайында тұтынушыдан пайдаланылмаған газ көлемінің құнынан 10% мөлшерінде «жіберілген пайданы өтеу» талаптарын қосқан. Мұндай талаптар «Газ және газбен жабдықтау туралы» заңында және Газ сату ережелерінде көзделмеген.

Сондай-ақ талдау барысында, серіктестік жыл сайынғы міндетті тұрмыстық газ жабдықтарына техникалық қызмет көрсетуді толық көлемде жүргізбегені, алайда көрсетілмеген қызметтер үшін де шот-фактуралар ұсынғаны анықталды, — делінген Бәсекелестікті қорғау және дамыту агенттігі хабарламасында.

Көрсетілмеген қызмет үшін төлем алу адал кәсіпкерлік қағидаттарын бұзып, жеткізушінің шарттық міндеттемелерін орындауға деген қызығушылығын төмендетеді.

Аталған әрекеттер Кәсіпкерлік кодексінің 174-бабы 4) тармақшасына сәйкес, доминанттық жағдайды теріс пайдалану ретінде сараланады.

Талдау қорытындысы бойынша серіктестікке:

• Газды толық алмау жағдайында «жіберілген пайданы өтеу» туралы шарттарды келісімдерден алып тастау;
• ТҚЖ бойынша көрсетілмеген міндетті қызметтер үшін шот-фактураларды ұсынуды тоқтату жөнінде хабарлама жіберілді.

Департаменттің хабарламасын Серіктестік толық орындады. 

Айта кетелік Бәсекелестікті қорғау агенттігі Antitrust ақпараттық порталын әзірлеп жатыр.