Қарағанды облысында қола дәуіріне тән қорымдар табылды
ҚАРАҒАНДЫ. KAZINFORM - Қарағанды облысы Шет ауданы Өспен ауылдық округінде археологиялық қазба жұмыстары аяқталды. Ғалымдар қола дәуірінің Ақбәйбіше қорымына тиесілі бес жерлеу орындарын тапты.
Археологтар тапқан жәдігерлердің бәрі қола дәуіріне жататындығын радиокөміртекті талдау растады.
Табылған бес қорымның үшеуі ауыл арасындағы жолда, ал екеуі ен далада болды. Барлық жерлеу орындары тоналған, бірақ ғалымдар әлі де қызықты артефактілерді таба алды. Олардың ішінде сол кезеңдегі өте сапалы керамика бөлшектері бар.
Бір қызығы, оның құрамындағы саз қазіргі Өспен ауылдық округіне тән, бірақ керамикалық бұйымдарды өндіру технологиясының өзі Орталық Қазақстанның шеберлеріне тиесілі. Бұған әр түрлі аймақтардан келген қолөнершілер тәжірибе алмасып, бір-бірінен үйренді деген болжам жасауға болады.
Сондай-ақ, археологтар эмбрион позасында бассыз көмілген адамның қаңқасын тапты. Бұл сол дәуірде өмір сүрген адамдардың күрделі рухани-мәдени идеялары мен дәстүрлерін көрсетеді.
– Біз табылған заттардың бәрін Қарағанды облысы мәдениет, мұрағаттар және құжаттама басқармасының тарихи-мәдени мұраны сақтау орталығына тапсырдық. Сол жерден артефактілер Өспен ауылының мұражай қорына бағытталды. Сол жерде оларды көруге мүмкіндік болады, – дейді экспедиция жетекшісі, «EcoProf KZ» ЖШС ғылыми-зерттеу бөлімінің жетекші археологы Александр Кнутов.
Қазір табылған жерлеу орындары қоршалған. Бұл келешекте олжаларды сақтау үшін қажет.
Сондай-ақ ғалымдар ХХ ғасырдың басында британдық инженер-конструктор Джон Уилфорд Уорделл салған Сарысу байыту фабрикасының қирандыларын әуеден де егжей-тегжейлі суретке түсірді.
– Бұл зауыттың қирандылары мәдениет басқармасына, кейбір жергілікті тұрғындарға, ақпаратты зерттеген туристерге белгілі болды. Бірақ аса танымал емес. Біз түсірген суреттер бойынша зауытты қайта құруға, оның архитектурасын іс жүзінде қалпына келтіріп көруге болады, – дейді Александр Кнутов.
Ғалымдар сонымен қатар Сарысу өзенінің бассейні аймағында археологиялық барлау жүргізді. Нәтижесінде олар қола дәуіріне, ерте темір дәуіріне, орта ғасырларға және қазіргі заманға жататын жаңа нысандарды тапты.
Олардың ішінде «мұртты» үлкен тас қорған – тасмола археологиялық мәдениеті бар. Ол ерте темір дәуіріне жатады және Орталық Қазақстанға тән.
Ғалымдар бұл нысандарды зерттеуін жалғастыруды жоспарлап отыр.
Осыған дейін Қарағанды облысы елдің жұмысшы мамандықтар дайындау орталығына айналатыны туралы жаздық.
