Қарағанды облысында жол апаты салдарынан 3 полицей ажал құшты

ҚАРАҒАНДЫ. ҚазАқпарат - Қарағанды облысында тәртіп сақшыларының қатысуымен екі жол-көлік апаты болып, салдарынан 3 полицей ажал құшты. Бұл туралы аймақтық ІІД баспасөз қызметінен хабарланды.

«6 желтоқсанда «Балқаш-Қарағанды» тас жолында «BMW 530I» көлігінің жүргізушісі, алдын ала болжам бойынша, көлікті басқара алмай, жыраға түсіп кеткен. Салдарынан полиция сержанты, ІІД ӘПБ жол-патрульді полиция батальонының қызметкері қаза тапты», - делінген хабарламада.

Жүргізуші мен көлікте болған екінші полицейге тиісті көмек көрсетілді.

Осыған дейін хабарланғандай, 7 желтоқсанда кешке Қарағанды-Ботақора» тас жолында болған жол көлік апатында 2 полицей қаза тапты. Алдын ала болжам бойынша, «ВАЗ-21102» жүргізушісі көктайғақ салдарынан көлікті басқара алмай, ол қарсы жолаққа шығып кетіп, «Фольксваген Пассат» көлігімен соғылған.

«ВАЗ-21102» жүргізушісі мен оның жолаушысы - Бұқар Жырау аудандық ІІБ қызметкері алынған жарақаттардан көз жұмды.

«Фольксваген-Пассат» жүргізушісіне медициналық көмек көрсетілді.

Екі факті бойынша да қылмыстық іс қозғалды, тиісті сараптамалар тағайындалып, тергеу амалдары жүргізілуде.

Ведомствоның ақпаратынша, екі жағдайда да полицейлер қызметтік міндеттерін орындау кезінде апатқа ұшыраған.