Қарағандыда жол ережесін бұзатын жүргізушілер нөмірін балшықтан тазартпайды

ҚАРАҒАНДЫ. ҚазАқпарат - Қарағандыда жол ережелерін бұзатын жүргізушілер автомобильдерін жылдамдық өлшеуіштер мен видеокамералар түсіріп алмас үшін, әдейі мемлекеттік нөмірлерді былғауда, деп хабарлайды «ҚазАқпарат» ХАА тілшісі.

«Құзырлы органдар видеобақылау камерасынан көргенде жол ережесін бұзған жүргізушілерді анықтамас үшін, әдейі мемлекеттік тіркеу нөмірлерін кірлету арқылы жасырып жүрген жүргізушілер бар», - деп хабарлады Қарағанды облыстық ішкі істер департаменті жергілікті полиция қызметінің баспасөз орталығы.

Жол-патрульдік полицейлер осындай фактілермен жиі кезігетіндіктен, 21-23 сәуір аралығында «Таза қала - таза нөмір» атты профилактикалық акциясын өткізу туралы шешім қабылданды.

«Акцияның басты мақсаты - көрінбейтін мемлекеттік тіркеу нөмірлері бар көлік құралдарын тізгіндеп жүрген жүргізушілерді анықтау. Қазіргі заңнама мемлекеттік тіркеу белгілерінің көзге көрінетіндей және оқылатындай болуын талап етеді, сондай-ақ белгіленген мемлекеттік стандартқа сәйкес болу керек. Оқылмайтын мемлекеттік нөмірлері бар көліктерді жүргізіп жүрген жүргізушілерге 5 айлық есептік көрсеткіш көлемінде айыппұл салынады», - деп түсіндірді жергілікті полиция қызметінің баспасөз орталығы.