Қарағандыда жылыту маусымына дайындық қалай жүріп жатыр
Мейрам Кожухов жылыту маусымына дайындық аясында қаланы аралауды жалғастырып жатыр.
«Көктемде ең маңызды және қажетті жобалардың бірі – ұзындығы 2,5 км құрайтын М10 жылу магистралінің (Таугүл ш/а орналасқан 10.1 павильонынан Мұқанов көшесі бойында орналасқан 10.2 павильонға дейін) учаскесін қайта құруға кірістік. Әрине, көпшілік үшін жоба немесе M-10 деген сөздер түсініксіз болуы мүмкін, бірақ қысқаша айтқанда, бұл жобасыз бүкіл Оңтүстік-Шығыс ауданы жақын болашақта жылусыз қалады. Бұл жоба не беретінін түсіндіре кеткенім жөн болар. Оңтүстік-Шығыста белсенді түрде жаңа үйлер мен ғимараттар салынып жатыр, болашақта жаңа нысандар орталық жылыту жүйесіне қосылады және «Степной-1», «Степной-2», «Степной-3», «Степной-4», «Гүлдер-1», «Гүлдер-2», «Кең дала», «Панель-Орталық» шағынаудандарын және Оңтүстік-Шығыс тұрғын ауданында салынып жатқан нысандарды ЖЭО-3-тен үздіксіз, сапалы жылумен қамтамасыз ету үшін қайта жаңғырту жұмысын жүргізіп жатырмыз. Яғни, осы ауданда гидравликалық параметрлер жақсарады, жылумен жабдықтау сапасы көтеріліп, апат 0-ге дейін азаяды», - деп атап өтті шаһар басшысы.
Оның айтуынша, бүгінгі таңда 1.1 км учаскеде жұмыс біткен, маусымның соңына дейін желінің 1.9 км жасалады, ал келесі жылы жоба толық аяқталады.
Тағы бір жоба – ЖЭО-3-тен Пришахтинск және Сұрыптауға барар бағыттағы жылу магистралін қайта құру.
Бұл жерде айта кететін бір жайт – аталмыш жылу магистралі 41 жыл бұрын –1982 жылы пайдалануға берілген және мұнда ешқашан күрделі жөндеу жүргізілмеген, тек қажетті апаттық ауыстыру болған.
«Өткен жылдың өзінде бұл учаскеден 90-ға жуық ақау шықты. Пришахтинск пен Сұрыптаудағы бүкіл жұмыстан кейін Шахтер кентінде апатсыз жылу беру қамтамасыз етіледі және үйлер жылуға қосылады. Сондай-ақ, екінші жоба - Пришахтинск және Сұрыптау бағытындағы жылу магистралін жаңарту, ол екі жылды қамтиды - биыл және келесі жылы», - деп атап өтті Мейрам Кожухов.