Қарақия ауданында 20 аққудың өлексесі табылды

аққулар
Фото: Маңғыстау өңірлік орман шаруашылығы және жануарлар дүниесі аумақтық инспекциясы

Маңғыстау облысының Қарақия ауданында жиырма аққу өліп қалған. Олардың барлығы арнайы орында жойылды, деп хабарлайды Kazinform.

Өңірдегі Қарақия ауданында теңіз жағалауында құстардың өлгені туралы дерек белгілі болды. Тексеру кезінде 20 аққудың өлексесі табылып, қазіргі уақытта полиция теңіз жағалауына адамдардың баруына белгілі бір мерзімге дейін шектеу қойған. Ал аудан әкімдігі аталған жағдайға қатысты тиісті жұмыстар қолға алынғанын мәлімдеді.

«Өздеріңізге мәлім, облыс бойынша арнайы комиссия құрылып, нақты тапсырма берілді. Қарақия ауданы бойынша 11 қаңтарда 12 аққудың өлексесі табылса, араға бір күн салып тағы 8 өлген аққу табылды. Бекітілген арнайы орында өлекселерді жою жұмыстары атқарылды. Қазір аудан аумағындағы теңіз жағалауында өлген аққуларды іздеу жұмыстары жалғасып жатыр. Осыған қатысты жергілікті атқарушы билік тарапынан теңіз жағасынан іздеутіру арқылы табылған аққулардың өлексесін жою жұмыстары жалғасады. Жергілі полиция теңіз жағалауына адамдардың баруына шектеу қойды. Адамға қауіп болмағанымен үй жануарларына қауіпті болмағанымен үй жануарлары үшін қауіп төндіреді. Аудан аумағында екі жарым мыңнан астам үй құстары бар. Өткен жылдың қыркүйек айында олардың екі мыңға жуығы вакцинациялаудан өтті», - деді аудан әкімінің орынбасары Асан Чукин.

2023 жылдың 21 желтоқсанынанда алғаш рет аққулардың қырылғаны туралы дерек белгілі болған еді.

Араға уақыт салып, Маңғыстау облыстық орман шаруашылығы және жануарлар дүниесі аумақтық инспекциясы 601 сыбырлақ аққудың өлімі дерегін ресми растады.

Сондай-ақ, Қаракөлдегі аққуларға Rixos қонақүйінен аққан қалдық судың қаншалықты қатысы бары туралы өзекті мәселе қозғалды.

Бұдан бөлек, Қаракөлде қырылған аққуларды жою үшін Ақтауға Атырау облысынан жылжылмалы крематорий пеш әкелінетіні мәлім болып отыр.

Соңғы мәлімет бойынша Маңғыстауда қырылған аққулар саны тоғыз жүзге жуықтаған.

Соңғы жаңалықтар