Қарақшылық шабуыл жасады деп сотталған екі ақтөбелік ақталып шықты

АҚТӨБЕ. KAZINFORM — Қарақшылық шабуыл жасап, сотталып кеткен екі ақтөбелік өздерінің жанында тағы екі адам болғанын айтып, қылмыстық іс тергелді. 2019 жылы басталған тергеуден соң былтыр тағы 2 ақтөбелік 4 жыл 6 айға бас бостандығынан айырылып, бүгін қайта ақталып шықты.

Қылмыстық оқиға 2016 жылы болды. Іс материалына сүйенсек, Ақтөбенің 2 тұрғыны жарнама сайтындағы хабарлама арқылы көлікті сатып алуға келісіп, кездесуге барады.

Бір күннен соң көлікті қайта қарауға келісіп, олардың жылжымалы мүлікті сатып алмай, қарақшылық шабуыл жасағаны белгілі болды. Құны 9 млн теңге болатын көлікті заңсыз иемденуді мақсат етіп, сатушы әкелі-балалы екі адамды ұрып-соғады.

Осы қылмыстық істен соң А және Б есімді екі ақтөбелік сотталып, 2016 жылы 10 және 12 жылға бас бостандығынан айырылады.

Арада 3 жыл өткенде, яғни, 2019 жылы бұл оқиғаға тағы екі адамның қатысы бар екенін айтып, полиция тергеу жүргізеді. 

— Сот алқасы қылмыстық іс материалдарын қайта қарап, куәгерлерді тыңдап сотталушыларды ақтау туралы ұйғарымға келді. Тергеу кезінде Ы және Н есімді екі сотталушының кінәсі толық дәлелденбеді. Сонымен бірге қылмыстық-процестік заңнама талаптары сақталмаған. Сот Ақтөбе облыстық полиция департаменті мен Ақтөбе облыстық прокуратурасына жеке қаулы шығарды, — деп хабарлады Ақтөбе облыстық сотының баспасөз қызметі. 

Айта кетейік, Ы және Н есімді екі ақтөбелік 2023 жылы 4 жыл 6 айға бас бостандығынан айырылған.