Қарасора-2024: Қызылорда облысында 207 есірткі құқық бұзушылығы анықталды
ҚЫЗЫЛОРДА. KAZINFORM - Қызылорда облысында «Қарасора-2024» кең ауқымды жедел алдын алу іс-шарасы барысында 207 есірткі құқық бұзушылығы анықталды.
Жедел алдын алу іс-шарасы республика аумағында 1 маусым-31 қазан аралығында өткізілді.
Есірткісі бар өсімдіктерді өсіру деректерін анықтауға, жасырын егістіктер және плантацияларды жоюға бағытталған іс-шара барысында 207 есірткі құқық бұзушылығы анықталған. Оның ішінде 67 есірткі өсіру, 9 өткізу, 6 есірткіні аса ірі мөлшерде сақтау, 17 жарнамалау, 1 есірткіні тұтынуға көндіру және 172 қылмыстық теріс қылық жағдайы бар.
«Заңсыз айналымнан барлығы 1,2 тонна каннабис өсімдігі, 13, 8 келі көкнәр, 30,8 келі марихуана, 1,1 келі гашиш, 57,4 грамм синтетика тәркіленді. Жалпы 11 мың 970 түп сора өсімдігі анықталды. Ал қыркүйек-қазан айларына дейін 3 тоннаға жуық марихуананың заңсыз айналымға түсуіне жол берілген жоқ. Далалық аймақтардан 19 ірі есірткі алқабы, үй, бау-бақша, саяжайлардан 48 дерегі анықталды. Есірткі өсірумен айналысқан 14 адам қамауға алынды», - деді Қызылорда облысы Полиция департаментінің есірткі қылмысына қарсы іс-қимыл басқармасы бастығының міндетін атқарушы Ардақ Дөненов.
Аталған іс шара барысында қылмысына қарсы іс-қимыл басқармасының қызметкерлері, Бүркіт АЖ, жылдам қимылдайтын арнайы жасақ қызметкерлері, Ішкі істер министрлігінің Ұлттық ұланының тікұшағымен пилотсыз ұшу аппараттары жұмылдырылды.
Әскери тікұшақ техникасының көмегімен 30 мәрте әуеден шолу жүргізіліп, есірткі өсірудің 11 дерегі анықталып, іздеудегі қылмыскер ұсталды. Ішкі істер органдарында тіркелмеген 5 заңсыз қару алынды.
Еске салсақ, бұдан бұрын Қызылорда полицейлері интернет алаяқтықпен айналысқан киберқылмыстық топты ұстады.
