KASE төрайымы Алина Алдамберген өз лауазымын босатты

АЛМАТЫ. KAZINFORM — 28 наурыздан бастап KASE басқарма төрайымы Алина Алдамбергеннің өкілеттігі оның өз бастамасы бойынша мерзімінен бұрын тоқтатылды.

Бұл туралы KASE баспасөз қызметі хабарлады. Қазақстан қор биржасы 9 жыл ішінде Алина Алдамберген KASE-ні дамытуда маңызды рөл атқарғанын айтып, оған алғыс білдірді.

— Биржаны басқарған тоғыз жыл ішінде Алина Алдамберген биржаның ауқымды технологиялық трансформациясын, халықаралық аренадағы позициясын нығайтуды және жаңа қаржы құралдарын енгізуді қамтамасыз ете отырып, KASE-ні дамытуда маңызды рөл атқарды. Оның стратегиялық пайымдауының арқасында KASE әлемдік стандарттарға сәйкес келетін жоғары технологиялық сауда-саттық платформасына айналды, — деп хабарлады KASE.

Алина Алдамбергеннің басшылығымен KASE-нің биржалық айналымы 4 еседен астам артқан. Қор нарығындағы сауда-саттық көлемі 5 есе, мәміле саны 44 есе, акция нарығын капиталдандыру көлемі 2,7 есе, ал KASE индексі 6,5 есе өскен. KASE тобының операциялық кірісі 10 есе көбейсе, комиссиялық кірісі 6 есе, пайыздық кірісі 37 есе артты. KASE тобының таза пайдасы 15 есе, меншікті капиталы 8 есе көбейді. KASE акционерлеріне дивиденд төлей бастады. 2024 жылы дивиденд сомасы 9,26 млрд теңге болды.

Еске салайық, бұған дейін KASE AIX-пен бірігу туралы келіссөз жүргізіп жатпағанын жазғанбыз.