Қауіпсіздік белдіктерінен ақау шыққан: Ford 112 мыңнан астам көлікті кері қайтарды

АСТАНА. KAZINFORM – Америкалық Ford автомобиль компаниясы қауіпсіздік белдіктерінен ақау шығуына байланысты 112 600 көлікті кері қайтарып жатыр. Бұл туралы Reuters АҚШ Ұлттық жол қозғалысы қауіпсіздігі басқармасына (NHTSA) сілтеме жасап хабарлады.

NHTSA-ға қауіпсіздік белдігін бекіту құрылғысының абайсызда өздігінен жұмыс істеп кетуі туралы шағымдар келіп түскен. Қатты дыбыс шығарғаннан кейін белдік тез тартылып қала берген.

Кері қайтарылған көліктер арасында 2019-2020 жылдары шығарылған Ford Expedition және Lincoln Navigator үлгілері бар.

NHTSA мәліметтері бойынша, тарту күшінің жоғалуы мен электр жүйесінің істен шығуына байланысты 456 000-нан астам Ford көліктеріне қатысты тергеу басталған. Тергеу барысында 2021-2024 жылдары шығарылған Ford Bronco Sport кроссоверлері мен Maverick пикаптары зерттеледі. 

Еске сала кетейік, бұған дейін шетелден әкелінген жүк көліктері тексерілетінін хабарлаған едік.