Қазақ рухын әлемге таныттық – «Сұңқар» жасағының капитанымен сұхбат
Дубайда өткен «The UAE SWAT Challenge 2025» арнайы мақсаттағы бөлімшелер сайысында Қазақстанның 5 командасы алғашқы ондыққа ілікті. Ал Ішкі істер министрлігінің «Сұңқар» жасағы сайыстың күміс жүлдегері атанған болатын. Осы орайда команда капитаны Мейрамбек Жайлаубаевпен сұхбаттасудың сәті түсті.
– «The UAE SWAT Challenge 2025» сайысынан олжалы оралдыңыздар. Жарысқа дайындық қалай жүрді? Бұл «Сұңқар» командасының әскерилерге арналған байқауға алғаш қатысуы ма?
– Салалық сайыс әскери құрылымды шыңдайды емес пе, бұл жолғы байқау да «Сұңқар» арнайы мақсаттағы жасағы үшін тәжірибеге айналды. Әуелден команда жан-жақты дайындық жүргізіп, ұжымдық стратегия құрды. Әрбір қатысушы өзіне жүктелген тапсырманы кәсіби шеберлікпен орындағанын айта кеткен жөн. Мұны шетелдік әріптестеріміз бен БАҚ-тың берген бағасынан аңғардық.
Оның үстіне «The UAE SWAT Challenge 2025» байқауына алғаш қатысуымыз емес. 2024 жылы сайыста бой көрсеттік. Ол кезде сайыстың бел ортасына дейін алғашқы орында көрінгенімізбен, қорытынды есепте VII орын бұйырды. Оған команда мүшесінің жарақат алуы себеп болған еді. Айта кетерлігі, төрешілер команданы жарыстан шығармауы үшін жарақат алған әскери қызметкер аяғының сынғанына қарамастан жаттығуды соңын жеткізген болатын. 74 команданың ішінде үздік ондыққа ену көңіл көншіткені рас, десе де қайта айналып алдыңғы қатарға қосылатынмызға сенім жоғары болды.
Биыл кеткен есені қайтару мақсатында тыңғылықты дайындық жүрді. Команда өз қару-жарағы, қажетті техникалық базасымен Дубайға аттанып, жеңіске лайық екенін дәлелдеді. Қазақтың жауынгерлік рухы, әскери жігер, азамат бойындағы күш-қуатты әлемге таныттық.
– Команда құрамында тәжірибелі мамандар жеткілікті секілді. Команда құрамына іріктеу қалай жүргізілді, сайысқа қанша маман барды?
– Ішкі істер министрлігінің «Сұңқар» жасағында білікті маман жеткілікті. Жауынгерлер құрамы толық, бәрі тәжірибелі. Сондықтан команда құрамын іріктеу барысында қиындық туған жоқ. Әлемдік аренада ел намысын қорғап жүрген жанкешті жауынгерлер әзірлігін көрсетіп, 14 әскери жарыста барын салды. Жеңіске деген ұмтылыс сынақтан сүрінбей өтуімізге сеп болғандай.
– Қытайлық команда жалпы есепте көш басында болғанын көрдік. Жеңімпаз команданың қандай артықшылығы болды?
– Алдымен аталған жарыс әскери маманнан қандай машықты талап ететінін аңғаруымыз керек. Сайыста тек білекті жеңбейді, тактикалық шешім мен ұжымның бірлескен әрекеті маңызды. Дубайға барар алдында күнделікті жеке құраммен тәрбие жұмысын, жауынгерлік даярлық жүргізілді. Команданың психологиялық ахуалы, күш-жігері бақылауда болды. Осы машықтарды жетілдіру арқылы алға жылжыдық. Онсыз ешқандай нәтиже болмайды.
ҚХР командасының ерекшілігіне келсек, мен байқаған бірнеше себепті атайын. Оларда оқу-дайындық орталығының материалдық жабдықталуы жоғары деңгейде. Жасақтың штаттық саны да көп. Оған қоса команда мүшелері фармацевтикалық дәрумендерді тұрақты қабылдап, қару-жарағын сақадай сай әкелген. Мұның барлығы жанама фактор болғанымен, көзге көрінетін артықшылық деп санаймын. Ал жауынгерлік даярлық тұрғысынан бізден артықшылығы жоқ. Себебі «Сұңқар» жасағы қарсыластарымызға қажетті тойтарыс бере білді.
– Сайысқа қазақстандық өзге күштік құрылымдар команда қосқанын байқадық. Сайыс барысында өзара бәсеке болды ма?
– «The UAE SWAT Challenge 2025» шарасына Қазақстаннан бірнеше команданың қатысуы – сала дамуының көрінісі. Яғни, күштік құрылымдар дербес команда жасақтап, өзара бәсекеге түсетін деңгейге жетті деген сөз. Мұндай қолайлы жағдайға министрлік тарапынан жүргізілген реформалар, әскери мектептердің бәсекеге ілесу қабілеті сеп болғандай.
Жарыс барысында қазақстандық әріптестерімізбен қатар өнер көрсеткенімізге қуаныштымыз. Шетелде ел намысын қорғау абыройлы міндет екені анық. Бұл міндетті қай құрылым мойнына алғаны маңызды емес, бастысы – сапалы жұмыс пен оң нәтиже.
P.S. Бұған дейін Мемлекет басшысы Қасым-Жомарт Тоқаев «THE UAE SWAT Challenge 2025» сайысында топ жарған күштік құрылым офицерлерін марапаттаған болатын.
