Қазақстан байланыс спутниктерін экспорттауы мүмкін бе – министр жауабы

АЛМАТЫ. KAZINFORM – Бұл сұраққа AlmatyFair.ai көрмесінде Цифрлық даму, инновациялар және аэроғарыш өнеркәсібі министрі Жаслан Мәдиев жауап берді. 

Ведомство басшысының айтуынша, Қазақстан Моңғолия және Конго мемлекеттерімен жерді қашықтықтан зондтау (ЖҚЗ) спутниктерін жеткізу туралы уағдаластыққа қол жеткізген. Бұл елдер қазақстандық технологияларды ауыл шаруашылығы, экология және табиғи ресурстардың мониторингі сияқты негізгі салаларда пайдалануды жоспарлап отыр.

Сондай-ақ бұл мемлекеттердің инженерлері спутниктер өндірісіне қатысып, техникалық құжаттаманы алады және әзірленген ақпараттық жүйелерге қол жеткізеді.

Жаслан Мәдиев Қазақстан байланыс спутниктерін қаншалықты экспорттауы мүмкін екенін де айтты.

— Жерді қашықтықтан зондтау спутниктері арқылы біз қазірдің өзінде әлемдік нарыққа шығып отырмыз, ал байланыс спутниктері бойынша — әзірге мұндай жоспар жоқ, - деді ол.

Министр Қазақстанда өзінің KazSat байланыс спутнигі жұмыс істеп тұрғанын, ал қазір келесі спутник — KazSat-3-ті өндіру немесе тапсырыс беру үшін техникалық құжаттаманы дайындау жүргізіліп жатқанын атап өтті.

Еске салайық, былтыр күзде Цифрлық даму, инновациялар және аэроғарыш өнеркәсібі министрі Жаслан Мәдиев спутниктерді экспорттауға қатысты екі елмен келіссөз жүргізіп жатқанын айтқан еді. 

Қазақстан спутнигін импорттауға қызығушылық танытқан елдердің қатарын Гвинея-Бисау толықтыруы мүмкін.