Қазақстан кубогы финалына екінші жолдама «Тобылға» бұйырды

АСТАНА. KAZINFORM - Қостанайлық «Тобыл» футболдан Қазақстан кубогы финалына берілген екінші жолдамаға ие болды.

ҚПЛ: «Тобыл» «Қайраттың» осал тұсын таба ала ма
Фото: sportplustv.kz

Жартылай финалда қостанайлық команда елордалық «Жеңіс» клубымен кездесті. 

Алғашқы ойында олар қарсыласынан 2:1 есебімен басым түскен еді. Сондықтан елордалық футболшылар екі ойынның нәтижесімен таразы басын теңестіруге ұмтылды. Бірінші кезеңде командалар есеп аша алған жоқ. 

Екінші кезеңнің 65-минутында «Жеңіс» сапынан Исламбек Қуат есеп ашса, оған «Тобыл» сапынан Егор Хавлько 87-минутта бір голмен жауап қайырды.

Осылайша командалар 1:1 есебіне қанағат білдірді. 

Сол арқылы «Тобыл» Қазақстан кубогы финалына жолдама алды. 

Ал бұдан бұрын шымкенттік «Ордабасы» футболдан Қазақстан кубогы финалына шықты.

Финал енді 4 қазанда Қызылорда қаласында өткізіледі.

Биыл Қазақстан кубогына Премьер-лига, Бірінші және Екінші лигадан барлығы 30 команда қатысты. Алдымен Бірінші және Екінші лига командалары алғашқы іріктеу кезеңін өткізді. 

Олардың арасынан іркілмей шыққан екі клуб 1/8 финалда Премьер-лига командалары қатарына қосылды.

Жеңімпаз 2026 жылы Конференция лигасының екінші іріктеу кезеңіне жолдама алады.

Соңғы жаңалықтар