Қазақстан кубогы: «Астана» елордада «Тұраннан» басым түсті
АСТАНА. ҚазАқпарат - Бүгін футболдан Қазақстан кубогы ширек финалында «Астана» елордада Түркістанның «Тұран» командасын қабылдады, деп хабарлайды ҚазАқпарат тілшісі.
Елордалық клуб аталған кездесуге негізінен жастарды қосты. Десе де, олар жасыл алаң төрінде жақсы ойын көрсетті. Нәтижесінде бірінші кезеңде Владислав Прокопенко 26, 39-минутта мергендік танытты.
Екінші кезеңде алаң иелері ойын тізгінін өз қолында ұстауға тырысты. Соған қарамастан, есеп өзгерген жоқ.
Осылайша, «Астана» қарсыласынан 2:0 есебімен басым түсті.
Айта кетерлігі, түркістандық клуб биыл бірінші лигада ойын көрсетіп келеді.
Енді «Тобыл» (Қостанай) мен «Шахтер» (Қарағанды), «Қайрат» (Алматы) мен «Ақтөбе» командалары кездеседі.
Ал, 21:00-де «Ордабасы» (Шымкент) мен «Қызылжар» (Петропавл) шеберлік байқасады.
Қарымта ойындар 7 маусымға белгіленген. Жартылай финал 28 маусым мен 8 шілдеде ойналады. Финал 4 қарашаға белгіленген.
