Қазақстан мен Өзбекстан су бөлу келісімінің жаңа жобасын әзірлеу бойынша келіссөз жүргізіп жатыр
ТАШКЕНТ. KAZINFORM – Су бөлу келісімінің жаңа жобасын әзірлеу бойынша Қазақстан мен Өзбекстан арасындағы келіссөз әлі де жалғасып жатыр, деп хабарлайды Kazinform агенттігінің меншікті тілшісі.
Өзбекстанның Ирригация және су мәселелері жөніндегі ғылыми-зерттеу институтының 100 жылдығына орай өткен конференцияға қатысқан ҚР Су ресурстары және ирригация министрі Нұржан Нұржігітов жаңа келісім бойынша жүргізіліп жатқан келіссөз жайлы айтты.
- Бұл жұмыс бүгінгі күнге дейін жалғасып жатыр. Атап айтқанда, Қазақстан және Өзбекстанның мемлекеттік органдарымен келісу процесі жүргізілуде. Бір-екі позиция қалып отыр, әзірге солар бойынша нақты шешімге келген жоқпыз. Тиісінше, келіссөз жалғасады, - деді Нұржан Нұржігітов Kazinform тілшісінің сауалына жауап бере отырып.
Тоқтала кетсек, биыл қаңтарда Қазақстан тарапы су бөлу келісімінің жаңа жобасын әзірлеп, оны Өзбекстанға жолдаған еді.
- Біз еліміздің мемлекеттік органдарымен келісілген жобаны өзбек тарапына бердік. 15 күн ішінде олар бізге жауап жолдайды, - деген еді Нұржан Нұржігітов жыл басында Kazinform тілшісіне берген сұхбатында.
Еске салайық, биыл 29 қантарда Душанбе қаласында Орталық Азияның Мемлекетаралық су шаруашылығын үйлестіру комиссиясының 88-ші отырысы өтті. Оның барысында жасалған келісім нәтижесінде Қазақстан көршілес елдерден көктемде 11 млрд текше метр су алатын болды.
