Қазақстан ОПЕК+ келісімі шеңберінде мұнай өндірісін қысқартады
АСТАНА. KAZINFORM – Наурыздан бастап еліміз мұнай өндіру көлемін азайтады. Бұл туралы Энергетика министрінің орынбасары Әлібек Жамауов мәлім етті.
- Иә, Қазақстан наурыз айында мұнай өндіруді оңтайландыруды жоспарлап отыр. Қажетті деңгейге дейін, яғни ОПЕК+ алдындағы міндеттемеге сәйкес жүзеге асырылады, - деді Әлібек Жамауов ведомствода өткен баспасөз мәслихатында.
Сондай-ақ БАҚ өкілдері вице-министрден Қазақстан Каспий құбыр консорциумы арқылы мұнай экспорты жоспары туралы сұрады.
- Өздеріңіз білетіндей, Қазақстанның мұнай экспортының негізгі бөлігі Каспий құбыр консорциумы арқылы жүзеге асырылады. Тиісінше, КҚК бойынша экспорт көлемі қысқартылады, - деп қысқа қайырды министрдің орынбасары.
Еске сала кетсек, былтыр жыл соңында ОПЕК+ елдері мұнай өндіруді 2026 жылға дейін қысқартуға келіскен еді.
Биыл ақпанда белгілі болғандай, ОПЕК+ елдері сәуірден мұнай өндіру көлемін арттыруға уағдаласты.
Бірер күн бұрын белгілі болғандай Қазақстан ОПЕК+ келісімі шеңберінде өз міндеттемелеріне адалдығын растады.
