Қазақстан параспортшылары Азиададан тағы үш медаль жеңіп алды
Қытайдың Ханжчоу қаласында өтіп жатқан Азия параойындарында қазақстандық параспортшылар тағы үш медаль жеңіп алды, деп хабарлайды Kazinform.
Қазақстандық парадзюдошы Жанбота Аманжол J2 санаты бойынша 90 келіге дейінгі салмақта финалға дейін сүрінбей жетті.
Жанботаның соңғы бәсекедегі қарсыласы мықты болды, оңтүстіккореялық Ли Чон Мин 2018 жылғы Азия пара ойындарының және биылғы әлем чемпионы еді.
Ол Жанботаны иппон әдісімен жеңіп кетті.
Тағы бір парадзюдошы Ғалымжан Смағұлұлы J2 санаты бойынша 90 келіге дейінгі салмақта қола жүлде үшін белдесуде Отабек Элисбековты (Өзбекстан) 1:0 есебімен қапы қалдырды.
Сонымен қатар паратаеквондошы, екі мәрте әлем чемпионы Өмірәлі Нышан күміс жүлдені қанағат тұтты.
Ол К44 санаты бойынша 80 келіден астам салмақта 2021 жылғы әлем чемпионы, ирандық Хамед Хагшенасқа 11:30 есебімен жол берді.
Еске сала кетейік, бұдан бұрын Зарина Райфованың Азия пара ойындарының күміс жүлдегері атанғанын жазған болатынбыз.
Сондай-ақ паразиадада Қазақстан қоржынына тағы 4 медаль түсті.
