18:10, 28 Сәуір 2022 | GMT +6
Қазақстан жасөспірімдер құрамасы ӘЧ іріктеу кезеңінің жартылай финалына шықты
НҰР-СҰЛТАН. ҚазАқпарат – Теннистен Қазақстан жасөспірімдер құрамасы Нью-Дели (Үндістан) қаласында 14 жасқа дейінгілер арасында өтіп жатқан әлем чемпионаты Азия/Тынық мұхит аймағы іріктеу кезеңінің жартылай финалына шықты, деп хабарлайды ҚазАқпарат тілшісі.
Қазақстандық ширек финалда Гонконг құрамасымен күш сынасты.
Қазақстан құрамасына алғашқы жеңісті Дамир Жалғасбай әперді. Ол қарсыласын 6:3, 6:1 есебімен тізе бүктірді.
Содан кейін команда көшбасшысы Заңғар Нұрланұлына кезек келді – 6:4, 6:1.
Ертең Қазақстан құрамасы (капитаны Сергей Квак) жартылай финалда Оңтүстік Кореямен кездеседі.
Оңтүстіккореялықтар тартысты матчта Үндістанды 2:1 есебімен жеңді.
Іріктеу сайыстарынан үздік шыққан үш команда әлем чемпионатының финалдық кезеңіне жолдама алады.
Еске сала кетейік, бұдан бұрын Александр Бубликтің «Мен – қазақпын» деп айтқанын, теннисші Андрей Голубевтің Мюнхен турнирінің жартылай финалына шыққанын жазған болатынбыз.