Қазақстанда алтын бағасы қандай

АСТАНА. KAZINFORM — Алтынның бір грамы шамамен 58 457 теңгені құрап отыр, деп хабарлайды Kazinform тілшісі. 

Қазақстан Ұлттық банкінің мәліметінше, 28 тамызда алтын грамының бағасы 58 456,84 теңгені құрап отыр.

Өткен бейсенбі, 21 тамызда бағалы металдың құны шамамен 57 888 теңге болды. 

Бұған дейін шет мемлекеттер алтын қорын неліктен АҚШ-та сақтайтынын жазған болатынбыз. 

Дүниежүзілік алтын кеңесінің (World Gold Council) хабарлауынша, Қазақстанның алтын қоры 7,4 тоннаға артып, елдің жалпы алтын қоры 298 тоннадан асқан. Халықаралық валюта қоры мен Еуропалық орталық банкті есептемегенде, Қазақстан алтын қоры бойынша 18-ші орында тұр.

Еске сала кетсек, Өнеркәсіп және құрылыс министрлігі еліміздің пайдалы қазбалармен қамтамасыз етілу мерзіміне қатысты жаңартылған деректерді жариялады. Соңғы мәліметтерге сәйкес, өндірістің бар көлемін ескере отырып, Қазақстандағы алтын қоры 30 жылға жетеді. 

Астанада банктік алтын құйма қалай құйылатыны туралы осы жерде оқыңыз. 

Бұған дейін хабарланғандай, Қазақстанда болжамды ресурстары бар 38 перспективалы учаске анықталды.

Дүниежүзілік алтын кеңесінің (World Gold Council) мәліметінше, 2025 жылдың бірінші тоқсанында алтынға жалпы сұраныс жылдық мәнде 1 пайызға артып, 1 206 тоннаны құрады — бұл 2016 жылдың бірінші тоқсанынан бергі ең жоғары көрсеткіш.

Орталық банктер бірінші тоқсанда 244 тонна алтын сатып алды, бұл алдыңғы тоқсанмен салыстырғанда аз.

Алтыннан жасалған зергерлік бұйымдарға сұраныс та рекордтық бағалар жағдайында күрт төмендеді, олардың көлемі 2020 жылдан бергі ең төменгі деңгейге жетті. Құндылық тұрғысынан алғанда, алтын зергерлік бұйымдарға тұтынушылық шығындар бір жылмен салыстырғанда 9%-ға өсіп, 35 млрд долларға жетті.

Ұлттық статистика бюросының мәліметінше, 2024 жылы алтын бұйымдарының бағасы 8,3 пайызға артты.