Қазақстанда бәсекелестікті одан ары дамыту қалай жүргізіледі
НҰР-СҰЛТАН. ҚазАқпарат- Бүгін Мәжілісте Қазақстан Республикасының кейбір заңнамалық актілеріне бәсекелестікті дамыту мәселелері бойынша өзгерістер мен толықтырулар енгізу туралы заң жобасы таныстырылды, деп хабарлайды ҚазАқпарат тілшісі.
«Бүгінде еліміздегі бәсекелестіктің жай-күйі негізгі тауарлық нарықтарға шоғырлануының және экономикадағы мемлекет қатысуының жоғары деңгейімен сипатталады. Осыған орай біздің жұмысымыз және заң жобасының нормалары экономикаға мемлекеттің қатысуымен байланысты үш негізгі реттеуші кедергіні шешуге бағытталған», - деді заң жобасын таныстырған ҚР Бәсекелестікті қорғау және дамыту агенттігі төрағасының бірінші орынбасары Рүстем Ахметов.
Оның атап өтуінше, біріншісі «негізгі қуаттарға» қолжетімділіктің шектеулілігі болып тұр.
«Бұл - инфрақұрылымдар мен ресурстар. Бизнес оларға қол жеткізбей тұтынушыларға қызмет көрсете алмайды. Қолжетімділіктің шектеулі болуы бизнестің қолданыстағы түрлерін кеңейтуді немесе жаңа түрлерін дамытуды қиындатады. Екіншісі – баға қалыптастырудың бұрмалануы. Бүгінде Кәсіпкерлік кодексте бағасы реттелуге жататын тауардың 14 түрі қарастырылған. Бұған қоса тауарлық нарықтардың басым бөлігіне әкімшілік баға бақылау іс-шаралары қолданылады. Табиғи немесе мемлекеттік монополия болмаған жағдайда баға реттеу инвестиция тартуды, инновация мен бәсекелестікті дамытуды тежейді», - деді агенттік төрағасының бірінші орынбасары.
Рүстем Ахметов үшінші кедергі ретінде іріктеу арқылы қамқорлық танытуды атады.
«Бұл – жекелеген компанияларға нарықтық билікті негізсіз жүктейтін құқықтық актілер қабылдау, бәсекелестіктің аллокативті тиімдлігін бұрмалайтын атаулы сипаттағы мемлекеттік қолдау іс-шаралары», - деді ол.
