Қазақстанда есірткі бизнесін ұйымдастырушылардың ішінде қай ел азаматтарының үлесі басым

АСТАНА. KAZINFORM — Ішкі істер министрінің орынбасары Санжар Мәдиев Қазақстанға 72 тонна есірткі химикатын әкелуді ұйымдастырған ресейлік туралы пікір білдірді.

Сенат отырысынан кейінгі баспасөз мәслихатында Санжар Мәдиевке елдегі есірткі бизнесіндегі ресейліктердің үлесі туралы сұрақ қойылды.

— Жуықта ғана Украинадағы соғыс басталғанда Қазақстанға қашқан ресейліктің ісі бойынша сот шешімі шықты. 72 тонна есірткі химикатын тасымалдауды ұйымдастырған күдікті 10 жылға сотталды. Есірткі қылмысы бойынша қудалау орбитасына тартылған азаматтардың ішінде ресейлік релоканттардың үлесі неше пайыз — деп сұрады журналист. 

Вице-министр сұраққа жалпылама жауап берді.

— Қазіргі таңда шетел азаматтарының есірткі қылмыстарына араласқаны туралы біраз фактілер дәлелденді. Екі трансұлттық ұйымдасқан қылмыстық топқа қарсы қылмыстық істерді тергеп жатырмыз. Оның ішінде Ресей, Украина және Тәжікстан азаматтары бар. Заң бойынша сізге оның мән-жайын толық ақпарат бере алмаймын. Бірақ осындай үлкен проблема бар екенін айту керек, — деді вице-министр.

Сондай-ақ, Санжар Мәдиев ел аумағында 92 есірткі зертханасы әшкереленіп, 18 тоннадан астам есірткі тәркіленгенін айтты.

Еске салсақ, бұған дейін есірткі бизнесін ұйымдастырғандар өмір бойына бостандығынан айырылатыны хабарланды.