Қазақстанда өзін құмар ойындардан шектегендер 170 мыңнан асты

АСТАНА. KAZINFORM – Туризм және спорт министрлігі Ойын бизнесін және лотереяны реттеу комитеті төрағасының орынбасары міндетін атқарушы Ғалымжан Мұстафаев лудоманиямен күрестің тиімді тәсілдері туралы айтты.

- Мемлекет басшысы биылғы шілде айында тиісті заңға қол қойды. Халық арасында бұл құжат «лудоманиямен күрес туралы» заң деп аталып кетті. Бұл құжат бойынша қолданыстағы 15 заңға және 8 кодекске толықтыру енгізілді. Осы заң нормалары 9 қыркүйектен бастап күшіне енді. Енгізілген 150 түзетуге тоқталсақ, оның ішінде букмекерлік кеңселер мен тотализаторлардың жарнамаларына шектеу қойылды. Сонымен қатар, бұл заңнама аясында жеке адамдардың өзін құмар ойындар мен бәс тігуден шектей алады. Бұған дейін азаматтар өзін құмар ойындардан 6 айдан 12 айға дейінгі мерзімге шектей алатын. Енді қыркүйекте күшіне енген нормаға сәйкес, 21 жасқа толған Қазақстан азаматы 6 айдан 10 жылға дейін осындай шектеуді қоя алады (қызметті eGov mobile қосымшасы арқылы пайдалануға болады), - деді Ғ. Мұстафаев Kazinform-ның YouTube арнасындағы Bızdıñ orta подкастында.. 

Оның айтуынша, бұл мәселеге қатысты зерттеу барысында халықаралық тәжірибелер назарға алынды. Бұл ретте мамандар 1 жыл уақытқа шектеу аз екенін айтып, 10 жылға дейінгі мерзім тиімді болатынын ұсынған.

- «Ойын бизнесі туралы» Заңының 15-1-бабы бойынша өзіне шектеу қойған адамның өтініші кері қайтарып алуға жатпайды. Егер бастапқыда 10 жылға шектеуге келіссе, сол мерзім аяқталғаннан кейін ғана уәкілетті орган оны тізімнен шығару туралы іс-қимылдар жасай алады, - деп түсіндірді ведомство өкілі.

Оның сөзіне қарағанда, өтініш бергеннен кейін, құмар ойындарға қатысуға шектеу қойылған адамдар тізіміне автоматты түрде енгізіледі және өтініш кері қайтарылмайды. Бұған дейін шектеу қойғандар үшін мерзімді ұзарту мүмкіндігі де бар. Бұл тұрғыда наурыз айынан бері eGov mobile қосымшасы арқылы электронды тәртіпте 170 мыңнан астам өзін құмар ойындардан шектеген.

- Атап айтқанда, электронды түрде осындай шектеуді енгізу мен букмекерлік кеңселерді жарнамалауға тосқауыл қою іс-шаралары ең тиімді нормалар деп санаймыз. Бұл өз кезегінде лудоманиямен күреске өз үлесін қосады», - деді Ғалымжан Мұстафаев.

Еске салсақ, биыл қыркүйек айында ҚР Туризм және спорт министрлігі туризм индустриясы комитетін қайта құрып, одан құмар ойындар мен лотереяларды реттеу жөніндегі комитетті жеке шығарды.

Шілде айында Мемлекет басшысы «Қазақстан Республикасының кейбір заңнамалық актілеріне ойын бизнесі, лотерея қызметі, денсаулық сақтау, мемлекеттік еңбек инспекциясы, мемлекеттік бақылау және артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» Заңына қол қойды. 

Заң арқылы халықтың ойынға тәуелділігін төмендетуге бағытталған шектеуші және ынталандырушы нормалар енгізіледі. 

Бұдан бұрын хабарланғандай, лудоманияға шалдыққандардың тек 8,3%-ы құмар ойындарға тәуелділігін мойындайды екен.

Осы жылы даурыз айында Мәжіліс депутаты Елнұр Бейсенбаев елімізде 400 мыңдай адам букмекерлер мен казинолардың тұрақты клиентіне айналғанын айтты.