Қазақстанда рақымшылыққа ілінгендерді босату жұмыстары аяқталып қалды

АСТАНА. KAZINFORM — Ішкі істер министрінің орынбасары Санжар Әділов Конституцияның 30 жылдығына орай жарияланған рақымшылыққа ілінгендерді босату жұмыстары аяқталып қалғанын айтты. 

— Рақымшылық іс-шаралары аяқталып қалды. Қамауда отырғандар босатылды, сондай-ақ рақымшылық аясында ауыр емес қылмыс және материалдық залал келтірмеген ауырлығы орташа қылмыс үшін қылмыстық қудалау бойынша қамтылғандарға да қатысты болды. Толық ақпаратты Ішкі істер министрлігінің баспасөз қызметі жариялайды, — деді Санжар Әділов Парламент Мәжілісінде тілшілер сұрағына жауап бере отырып.

Оның айтуынша, қамаудан босатылғандарға қатысты міндетті түрде пробациялық қадағалау болады.

Айта кетсек, 2025 жылғы 23 маусымда Президент рақымшылық туралы заңға қол қойды. 

Бұған дейін Парламент Мәжілісінде рақымшылық жасау туралы заң жобасын талқылау кезінде босатылатын адамдардың саны белгілі болды.