Қазақстанда техникалық байқау жүргізуге рұқсат беретін уәкілетті орган анықталды
АСТАНА. KAZINFORM – Елімізде техникалық байқау операторларының қызметіне екінші санаттағы рұқсаттар беруге уәкілетті орган айқындалды. Бұл туралы қаулы жобасы «Ашық НҚА» порталында жарияланды.
«Қазақстан Республикасының Көлік министрлігі техникалық байқау операторларының қызметіне екінші санаттағы рұқсаттар беруге уәкілетті орган болып белгіленсін», - делінген құжатта.
Жоба 2024 жылғы 3 қазанда қабылданған көлік құралдарының жекелеген түрлерінің қозғалысын ұйымдастыру және жол қауіпсіздігін цифрландыру мәселелері бойынша «Жол қозғалысы туралы» заң шеңберінде әзірленді.
Қаулы 2025 жылғы 5 сәуірден бастап қолданысқа енгізіледі, ал 18 қарашаға дейін жұртшылық талқысына ұсынылып отыр.
Айта кетейік, қыркүйекте автокөлікті техникалық байқаудан өткізу сапасын тиімді бақылаудың жаңа тетіктері әзірленетіні туралы хабарлаған едік.
Сондай-ақ, біздің агенттік ел өңірлерінде автокөлікті техникалық байқаудан өткізу бағасына шолу жасаған еді.
