Қазақстандағы жолдар құрылысында отандық компанияларға артықшылық беріледі

АСТАНА. KAZINFORM – Биыл «Жезқазған-Қарағанды», «Ақтөбе-Ұлғайсын», «Атырау-Доссор» жаңа жолдарының құрылысы басталады. Бұл туралы Көлік министрі Марат Қарабаев айтып берді.

− Өткен жылы 12 мың шақырым жол жөндеу жұмыстарымен қамтылды. Биылғы құрылыс жұмыстары өткен жылғы деңгейден жоғары, яғни 13 мың шақырым. Оның ішінде 9 500 шақырымға арналған жобалар қаражатпен толық қамтылған, қалған 3600 шақырым бойынша қаржыландыру мәселесі халықаралық институттармен бірге пысықталды, − деді Көлік министрі бүгінгі Үкімет отырысында.

Министрдің айтуынша, биыл «Жезқазған-Қарағанды», «Ақтөбе-Ұлғайсын», «Атырау-Доссор» жаңа жобалары және Сарыағаш, Рудный және Қызылорда қалаларының айналма жолдары және жалпы ұзындығы 3600 шақырымды қамтитын жөндеу жұмыстары қолға алынбақ.

Әрбір жоба бойынша үйлестіру кеңесінің шешімімен қаржыландыру көздері анықталған, техникалық-экономикалық негіздемелдері әзірленген және халықаралық қаржы институттарының шарттарына сәйкес, мердігер ұйымдарды анықтау бойынша конкурстық рәсімдер жүріп жатыр.

Сондай-ақ, құрылыс жұмыстарына қазақстандық мердігер компанияларды тарту мақсатында халықаралық қаржы институттары тендерлік талаптарды қайта қарап, біздің компанияларға басымдықтар беруді қарастырған.

− Бұл шаралар конкурстарға қатысушы отандық компаниялар санын арттыруға мүмкіндік берді. Мысалы, «Қарағанды — Жезқазған» жобасы бойынша жергілікті компаниялар саны 10-ға жетті, ал бұрын талаптар өзгертілгенше бұл көрсеткіш екеуден аспаған. Жоғарыда аталған барлық жобалар бойынша екінші тоқсанда мердігер ұйымдар анықталады, — деді Марат Қарабаев.

Кеше Қазақстанның ақылы жолдарында кімдер тегін жүре алатынын хабарлаған едік.