Қазақстандық мамандар Өзбекстанда су үнемдеу технологияларын игеріп жатыр
ТАШКЕНТ. KAZINFORM – Қазақстан мен Өзбекстанның су шаруашылығы мамандары су үнемдеу технологияларын дамыту бойынша тәжірибе алмасып жатыр, деп хабарлайды Kazinform агенттігінің меншікті тілшісі.
Айта кетейік, биыл қаңтарда Қазақстан мен Өзбекстанның су шаруашылығы министрлері үнемдеу технологияларын дамыту үшін бірлескен семинарлар өткізуге уағдаласқан болатын. Сол келісімнің негізінде қазақстандық мамандар Ташкенке келіп, өзбек тарапының тың тәсілдерімен танысып жатыр.
— Мұнда біз тәжірибе алмасып жатырмыз. Атап айтқанда, су үнемдеу технологияларын игеру процесі, тиімді тәсілдерді енгізуді үйрену үстіндеміз. Бұл ретте Өзбекстанда су шығынын қысқарту бойынша қолға алғанған жобалармен таныстық. Осы технологияларды игеріп, Қазақстанда енгізуді жоспарлап отырмыз, - деді ҚР Су ресурстары және ирригация министрлігінің Тарифтік саясат департаменті директорының орынбасары Қанат Оралов.
Тәжірибесімен бөліскен өзбекстандық маман Сабиджон Маматов Орталық Азиядағы мұздықтардың еру қарқыны жоғары екенін атап өтті. Оның сөзінше, аймақ елдері бүгіннен бастап су үнемдеуге ден қойғаны абзал.
— Өзбекстан су үнемдеу технологияларын енгізуге ерекше мән береді. Біз қазақстандық әріптестерімізге бұл саланы қалай дамытып жатқанымыз жайлы айтып бердік. Біз қаласақ та, қаламасақ та Орталық Азияда су тапшылығы болады. Бүгінге дейін мұздықтардың 30%-ы еріп кетті. Сондықтан қазірден қам жасау маңызды. Бұл бағытта ең тиімді тәсіл — су үнемдеу технологияларын енгізу, - деді ӨР Су басқару ұлттық жобасының маманы Сабиджон Маматов.
Еске салайық, бұған дейін өзбекстандық компаниялар Қазақстанда су үнемдеу технологияларын енгізумен айналысуы мүмкін екенін жазып едік.
Сонымен қатар биыл қаңтарда өзбекстандық әріптесімен кездескен ҚР Су ресурстары және ирригация министрі Нұржан Нұржігітов ресми Астана мен Ташкент су бөлу келісімінің жобасын әзірлеп жатқанын мәлім етті.
Мұнымен бірге, Қазақстан мен Өзбекстан Сырдария бойына су есептейтін құрылғылар орнатуды биыл аяқтауды жоспарлап отыр.
