Қазақстандық оқушылар Халықаралық физика олимпиадасында 1-орын алды
АСТАНА. KAZINFORM – Ресейдің Ханты-Мансийск қаласында Халықаралық ғылыми физика олимпиадасы (ISPhO-2025) мәресіне жетті. Білім бәйгесінде Қазақстан құрамасы жалпыкомандалық есепте 1-орынды иеленіп, әлемдік көшбасшылар қатарына енді.
Оқу-ағарту министрлігі мәліметінше, әлемнің 21 елінен келген қатысушылар арасында 5 жас қазақстандық елге он марапатпен оралды.
Олимпиада екі негізгі кезеңнен тұрды: теориялық және эксперименттік кезең. Әр қатысушы жеке есепте екі бағыт бойынша бағаланды.
Жарыс қорытындысы бойынша Алматы қаласы «Мирас» мектебінің 11-сынып оқушысы Роман Черемнов, Қостанай облыстық «Білім-инновация» лицейінің 10-сынып оқушысы Таир Әбдіқадыр, Астана қаласындағы РФММ-нің 11-сынып оқушысы Альтаир Аканов, Алматы қаласындағы РФММ-нің 10-сынып оқушысы Илияс Қазымбек күміспен күптелді. Сондай-ақ Астана қаласы «NURORDA» мектеп-лицейінің 11 сынып оқушысы Даниэль Тюлюбаев қола жүлдеге қол жеткізді.
Теориялық айналым нәтижелері бойынша 1-дәрежелі дипломмен Роман Черемнов пен Илияс Қазымбек; 2-дәрежелі дипломмен Даниэль Тюлюбаев, Таир Әбдіқадыр және Альтаир Аканов марапатталды.
Айта кетейік, оқушыларға Самат Максутов (PhD доктор) пен Назарали Айтжанов (CDU доценті) жетекшілік етті.
Бұған дейін қазақстандық оқушылардың Литвадағы Еуропа олимпиадасында 7 медаль жеңіп алғанын жазған едік.
