Қазақстанның 5 мың шақырымға жуық теміржолы жаңғыртылады

АСТАНА. KAZINFORM – Биыл еліміздің 5 мың шақырым теміржолында құрылыс және жөндеу жұмыстары өтеді. Бұл туралы Көлік министрі Марат Қарабаев айтып берді.

Министрдің айтуынша, 2400 шақырым үшін қаржы көздері анықталды, қалған 2600 шақырым Президенттің Трансқазақстандық теміржол дәлізін дамыту жөніндегі тапсырмасын іске асыру шеңберінде жоспарланған.

− Осыған байланысты, бірқатар жаңа жоба жүзеге асырылады: «Қызылжар — Мойынты» жаңа теміржол желісі салынады, екіжолақты «вставка» мен қабылдау-жөнелту жолдарын салу арқылы «Алтынкөл — Жетіген» және «Бейнеу — Маңғыстау» учаскелері жаңғыртылады, − деді Марат Қарабаев бүгінгі Үкімет отырысында.

Сонымен бірге, «Қызылжар — Сексеуіл», «Шалқар — Бейнеу», «Қандыағаш — Тобыл», «Әлімбет — Никельтау» және «Ақсу — Дегелең — Жаңа-Семей» учаскелерінде заманауи реттеу жүйелері енгізіледі.

Еліміздің 53 теміржол вокзалдары реконструкцияланады.

Бұған дейін Көлік министрі Қазақстандағы жолдар құрылысында отандық компанияларға артықшылық берілетінін айтқан еді.

Сондай-ақ, биыл «Жезқазған-Қарағанды», «Ақтөбе-Ұлғайсын», «Атырау-Доссор» жаңа жолдарының құрылысы басталады.