Қазақстанның үздік қымыз өндірушілері анықталды
АСТАНА. KAZINFORM – Астанада өткен ауқымды «BaiQymyz – бапталған қымыз» гастрофестивалі өз деңгейіне жетті.
Ұйымдастырушылардың мәліметінше, қазақтың ұлттық сусыны – қымызға арналған бұл мәдени іс-шара екі күн бойы 70 мыңнан астам қонақты қабылдап, қазақи рухтағы дәм мен дәстүрдің мерекесіне айналды.
Фестивальдің ең маңызды сәттерінің бірі – еліміздің түкпір-түкпірінен келген қымыз өндірушілер арасында өткен «Ең үздік қымыз» байқауы болды. Жеңімпаздар фестиваль қонақтарының дауыс беруі арқылы анықталып, қомақты қаржылай сыйақымен марапатталды.
«Ең үздік қымыз» байқауының жеңімпаздары:
• І орын – Абай облысы Саржал ауылынан «Жаныс» шаруа қожалығы – 20 млн теңге
• ІІ орын – Қарағанды облысы Қарқаралы ауданынан «Қарынши» шаруа қожалығы – 15 млн теңге
• ІІІ орын – Ақмола облысынан «Қабдулин» шаруа қожалығы – 10 млн теңге.
Сондай-ақ арнайы номинациялар бойынша да үздіктер марапатталды:
• «Алтын күбі» номинациясы – Қарағанды облысы, «Батыр рух» – 1 млн теңге
• «Алтын қор» номинациясы – Ұлытау облысы, «Nomad milk» – 1 млн теңге
• «Күміс торсық» номинациясы – Абай облысы, «Әділ қымыз» – 500 000 теңге
• «Текті сусын – Күміс шара» номинациясы – Ақмола облысы – 500 000 теңге.
Одан бөлек фестиваль аясында «Ер қанаты» атты жылқы көрмесі өтті. Аталған іс-шараны 3 000-нан астам адам тамашалады. Элиталы тұқымдар – гонновер, таза қанды ағылшын, орыс желісті, ахалтеке жылқылары мен қазақы тұқымдар: жабы, мұғалжар, қостанай, бесқарағай және «Ұлы дала жорығы» бәйгесінің чемпиондары келушілер назарын аудартты.
Көрме жеңімпаздары:
• «Қазақтың ең сұлу жылқысы» номинациясы – Мұғалжар тұқымы
• «Қазақтың ең жүйрік жылқысы» номинациясы – Қостанай тұқымы
Еске салсақ, елордада «BaiQymyz» ұлттық тағамдар гастрофестивалі өтті.
Байқаудың мақсаты — еліміздегі ең сапалы әрі шипалы қымызды анықтау. Негізгі мақсат — қымызды денсаулық пен қонақжайлықтың символы ретінде таныту, сонымен қатар агротуризм мен жылқы шаруашылығын дамытуға серпін беру.
Сондай-ақ қымыз фестиваліне ел өңірлерінен 30 тоннаға жуық қымыз әкелінді, осы орайда ұйымдастырушылар рекорд орнағанын айтып отыр.
