Қазақстанның жеңіл өнеркәсіп нарығы шикізат моделінен арылуға көмектесе ме

АСТАНА. KAZINFORM — Өткен жылы Қазақстанның жеңіл өнеркәсіп нарығы 4,3 млрд АҚШ доллары болып, онда отандық өндірушілердің үлесі шамамен 6% болды. Бұл туралы Өнеркәсіп және құрылыс министрлігі Өнеркәсіп комитеті төрағасының орынбасары Мұхамед Андақов айтып берді.

Спикердің айтуынша, бұл сала көптеген қиындыққа қарамастан дамуын жалғастырып, экономикалық және әлеуметтік салаларға өз үлесін қосып келеді.

− Жалпы ішкі өнімдегі жеңіл өнеркәсіптің үлесі 0,09% көрсетті. Бұл ретте 28 мың адамды, оның 60%-ы әйелдер қауымын жұмыспен қамтылуын қамтамасыз етіп, мемлекетте жоғары әлеуметтік рөл атқарып отыр. 2024 жылы Жеңіл өнеркәсіп өндірісі шамамен 211,6 млрд теңге болды, − деді Мұхамед Андақов Орталық коммуникациялар қызметінде өткен баспасөз мәслихатында.

Соңғы 3 жылда жеңіл өнеркәсіп өнімдерінің экспорты 2,5 есе өскен. Саланың негізгі капиталына салынған инвестициялар 12,4 млрд теңге.

Жеңіл өнеркәсіп 20-дан астам қосалқы саланы қамтиды, онда тоқыма өнеркәсібі — 57% (мақта-мата, жүн және аралас маталар, синтетикалық және табиғи талшықтар), киім өндірісі — 34% (арнайы және жұмыс киімдері, күнделікті және сәнді киімдер, әскери және спорттық киімдер) және былғары өнімдер өндірісі — 9% (аяқ киімдер, былғары бұйымдары, былғары сөмке, белдік және аксессуарлар).

− 2025 жылғы 1 наурыздағы дерекке сәйкес, жеңіл өнеркәсіпте 1411 кәсіпорын, 803 тігін кәсіпорыны, 481 тоқыма бұйымдарын өндіру және 122 былғары өнімдері кәсіпорындары жұмыс істейді. Тұтастай алғанда, өнеркәсіптік саясаттың негізгі мақсаты — ішкі өңдеуді ұлғайтып, шикізаттық даму моделінен бас тарту. Бұл мақсатқа инвестиция тарту, жобаларды іске асыру және жүйелі шараларды іске асыру арқылы жоспарлы түрде қол жеткізіледі, − дейді Мұхамед Андақов.

Бұған дейін Kazinform агенттігі Атырауда 9 жыл бұрын ашылған тоқыма фабрикасы неге істемей тұрғанын жазған еді.