Кентау колледжінің студенті оқушыларға кәсіби бағдар беретін ерекше стенд жасады

АСТАНА. KAZINFORM — Кентау политехникалық колледжінің 4-курс студенті Ұлықбек Бахтияров жұмысшы мамандарын даярлауға арналған оқу стендін жасап шығарды. Бұл туралы Оқу-ағарту министрлігінің баспасөз қызметі хабарлады. 

ASAR-1 — инженерлік мамандықтарды біріктіретін білім беру стенді. Оның көмегімен 13 түрлі инженерлік және техникалық бағыттардың негіздерімен танысуға болады. Бұл стенд оқушыларға болашақ кәсібін таңдауға мүмкіндік береді. Мұнда сондай-ақ электроника, автоматтандыру, бағдарламалау және мехатроника бағыттары бойынша практикалық тапсырмаларды орындауға болады.

Стендте 22 түрлі датчик пен компонент қойылған. Олардың қатарында DHT11 температура мен ылғалдылық датчигі, дыбыс датчигі, газды анықтау сенсоры, RFID модулі, Bluetooth және Wi-Fi модульдері, ультрадыбыстық датчик, сервомоторлар, дисплей, жарықдиодтар, реле және басқа да элементтер бар.

— Мен оқушылардың мектеп қабырғасынан бастап мамандық таңдап, оған кәсіби тұрғыда дайындалуына көмектескім келеді, — дейді Ұлықбек.

Жоба авторының айтуынша, стендті жасауға алты ай үздіксіз инженерлік жұмыс пен ізденіс қажет болды. ASAR-1 елімізде жарияланған Жұмысшы мамандықтар жылы аясында ерекше маңызға ие. Бұл стенд ауыл мектептерінен бастап, ірі қалалардағы оқу орындарына дейін кеңінен таралып, техникалық мамандықтардың мәртебесін көтеріп, жастарға ерте жастан кәсіби бағдар беруге үлес қоса алады.

Айта кетелік ЖОО-ға құжат қашан қабылданатыны белгілі болды.