Кейінгі 5 айда Қазақстан Өзбекстанға 2 млн тонна астық экспорттады
ТАШКЕНТ. KAZINFORM – Былтыр қыркүйектен бастап биыл 16 ақпанға дейін Қазақстан шет елдерге 5,4 млн тонна астық экспорттады, деп хабарлайды Kazinform агенттігінің меншікті тілшісі.
«Қазақстан темір жолы» компаниясының алдын ала мәліметіне сай, қамтылып отырған кезеңде экспорт көлемі 48,3%-ға өсті.
Қазақстан астығын ең көп сатып алған елдер көшін Өзбекстан бастап тұр. 5 айдан аса уақыт ішінде бұл мемлекет 2 млн тонна өнім импорттады.
Сонымен қатар, Тәжікстан (789 мың тонна), Қытай (679 мың тонна), Иран (644 мың тонна), Әзербайжан (319 мың тонна) және Ауғанстанға (235 мың тонна) экспортталған астықтың көлемі артты.
Айта кетейік, 2024 жылдың қорытындысы бойынша Қазақстан өзге елдердің нарығына 8,1 млн тонна астық шығарды. Бұған қоса, еліміз 2,4 млн тонна ұн экспорттаған. Дайын өнімді Орталық Азия елдері, Қытай және Ауғанстан көп көлемде импорттап жатыр.
Еске салайық, таяуда Ауыл шаруашылығы министрінің орынбасары Азат Сұлтанов Қазақстан Ресей арқылы Еуропаға бидай экспорттау көлемін ұлғайтуды жоспарлап отырғанын мәлімдеп еді.
Мұнымен бірге, биыл елімізде бидай егетін алқаптардың көлемі қысқарып, өнімділігі жоғары дақылдар аумағы артады.
