ҚХЛ: «Барыс» алғашқы кездесуінде «Нефтехимикке» есе жіберді
АСТАНА. KAZINFORM - Қазақстандық «Барыс» командасы бүгін Құрлықтық хоккей лигасындағы алғашқы ойынын елордада Ресейдің «Нефтехимик» (Нижнекамск) командасына қарсы өткізді.
Кездесу барысында елордалық командадан Уэйд Эллисон 36- минутта есеп ашса, ресейлік клубтан Владимир Брюквин 49-минутта таразы басын теңестірді.
Негізгі кезеңде 1:1 есебі тіркеліп, ойын овертаймға ұласты.
Овертаймда «Нефтехимик» жеңіс шайбасын соғып кетті.
Екі команда бұған дейін 45 мәрте кездескен. Оның 26-ы елордалық клубтың басымдығымен аяқталса, қалған ойында ресейлік команда жеңіске жеткен.
Биыл елордалық клуб алғашқы төрт ойынын өз алаңында өткізеді.
Алдымен бүгін «Нефтехимик» (Нижнекамск) командасын қабылдаса, одан кейін 6 қыркүйекте «Трактор» (Челябі), 9 қыркүйекте «Амур» (Хабаровск), 13 қыркүйекте Беларусьтің «Динамо» (Минск) командаларымен шеберлік байқасады.
Елордалық команда жаңа маусымға дайындық алдында бас бапкері қызметіне канадалық Дэвид Немировскиді шақырды. 1993-2014 жылдар аралығында хоккейші ретінде ойын көрсеткен ол 2018 жылдан бері бапкерлік қызмет атқарып келеді.
