Қытай ШЫҰ аясындағы ынтымақтастықты 8 бағыт бойынша ілгерілетпек
ТАШКЕНТ. KAZINFORM — Қытай тарапы Ташкентте өткен дөңгелек үстел барысында Шанхай Ынтымақтастық Ұйымына (ШЫҰ) төрағалық ету кезеңінде атқаратын жұмыстардың жоспарымен бөлісті, деп хабарлайды Kazinform агенттігінің меншікті тілшісі.
Іс-шараға қатысқан Қытайдың Өзбекстандағы елшісі Юй Цзюнь ұйым аясындағы ынтымақтастықты 8 негізгі бағыт бойынша ілгерілету көзделгенін айтты.
— ШЫҰ-ның саяси салмағы арта түсті. Оған мүше болуға ниетті елдер қатарының артып келе жатқанын осыған дәлел. Қытай өз төрағалығы кезінде 8 бағытта ынтымақтастықты жүйелі жолға қоюға ниетті. Атап айтқанда, кедейлік деңгейін төмендету, азық-түлік қауіпсіздігі, денсаулық сақтау, жобаларды тиімді қаржыландыру, климаттың өзгеруі, «жасыл» технологияларды енгізу, индустрияландыру және цифрлық экономиканы дамыту. Сондай-ақ, Қытайдың төрағалығымен 40-тан астам отырыс, түрлі форумдар өткізу жоспарланған, — деді Юй Цзюнь.
Отырыс барысында саясаттанушылар былтыр аяқталған Қазақстан төрағалығына жоғары баға беріп, барлық бағытта байланыстарды нығайта түсудің маңызына тоқталды.
— Ұйымға мүше елдердің өзара тиімді диалогы ШЫҰ аясындағы ынтымақтастықты жоғары деңгейге шығарды. Бұл ретте Қазақстан мен Өзбекстанның рөлі ерекше. Алғашында өңірлік қауіпсіздік мәселелерін шешуге бағытталған ұйым бүгінде экономикалық дамуға ойысып жатыр. Мәселен, мемлекеттер азық-түлік қауіпсіздігін қамтамасыз ету және көлік-логистикалық жобаларды бірлесіп іске асыруға мүдделі. Сондықтан ШЫҰ-ның әлеуеті мол, — деді өзбекстандық саясаттанушы Мурат Бахадиров Kazinform тілшісінің сауалына жауап бере отырып.
Еске салайық, былтыр шілдеде Астанада өткен ШЫҰ саммиті барысында 25 құжатқа қол қойылды. Көптеген әлем елдері Қазақстанның ұйымға төрағалығын жоғары бағалады. Еліміздің бастамалары ұйымның жұмысына серпін берді.
Сонымен қатар, таяуда Түркия ШЫҰ-ның толық мүшесі атануға ниетті екенін мәлімдеді.
