Қызылорда облысында бруцеллез жұқтырған 70 мал сойылды

ҚЫЗЫЛОРДА. KAZINFORM — Адам мен жануарға ортақ жұқпалы бруцеллез ауруының алдын алу мақсатында биыл Қызылорда облысында 866,1 мың малдан қан сынамасы алынып, тексерілді. Оның басым бөлігі — уақ мал мен мүйізді ірі қара.

Облыстық ветеринария басқармасы мәлімдегендей, аса қауіпті жұқпалы ауруға қарсы зерттеуге алынған қан сынамалары мен патологиялық материалдар ветеринариялық зертханаларда зерттелді. 

— Нәтижесінде 42 сиыр, 28 уақ малдың қауіпті дертті жұқтырғаны анықталып, ветеринариялық-санитариялық талаптарға сәйкес уақытылы сойылды. Қазіргі күні облыс көлемінде аса қауіпті аурулар тіркелген жоқ. Эпизоотиялық жағдай тұрақты, — делінген басқарманың хабарламасында.

Жоспарға сәйкес жыл соңына дейін облыстағы 1697,9 мың бас төрт түлік және ит, шошқаның қан сынамасы зерттеледі. 

Бұған дейін Ауыл шаруашылығы министрлігі ветеринариялық құжаты жоқ мал өнімдерін сатқандарды қылмыстық жауапқа тартуды ұсынғанын еске саламыз.