Қызылордада 40 бейнебақылау камерасы жасанды интеллект көмегімен жұмыс істеп тұр
ҚЫЗЫЛОРДА. KAZINFORM – Қызылорда қаласында қоғамдық қауіпсіздікті қамтамасыз ету, қоғамдық орындарды ластау фактілерін анықтау мақсатында 272 бейнебақылау камерасы орнатылған.
Облыстық полиция департаментінің баспасөз қызметі хабарлағандай, оның 53-і қоқыс жәшіктері орналасқан аумақтарда тұр.
Жедел басқару орталығының 40 камерасы жасанды интеллект алгоритмінің көмегімен жұмыс істейді. Оның ішінде бейне ағынын өңдеуге, талдауға мүмкіндік беретін пилоттық режимдегі Target EYE бағдарламасына қосылған.
– Жыл соңына дейін тағы 1400 бейнебақылау камерасы орнатылып, бағдарламаның қоғамдық орындарды ластау дерегін автоматты түрде анықтау функциясы толық іске қосылады – деді департамент бастығының орынбасары Сәбит Ибадулла.
Жыл басынан бері көпшілік орындарды ластаған, абаттандыру қағидаларын бұзған 5,5 мыңнан астам дерек анықталды.
Облыстық полиция департаменті жақында есірткі қылмысына қарсы іс-қимыл басқармасы «Киберқадағалау» ақпараттық жүйесі арқылы синтетикалық есірткі заттарын жарнамалайтын 71 сайтты бұғаттады.
