Қызылордада бір күнде 3 мың тоннадан астам қоқыс шығарылды

ҚЫЗЫЛОРДА. KAZINFORM - Бүгін Қызылорда облысының тұрғындары жаппай сенбілікке шықты.

«Таза Қазақстан» республикалық экологиялық бағдарламасы аясында ұйымдастырылған шараға 80 мыңнан астам адам қатысты.

Тазалық жұмыстары нәтижесінде 3 300 тонна шамасында қоқыс шығарылды. Сондай-ақ елді мекендердегі скверлер мен парктер, тарихи мәдени ескерткіштер, әлеуметтік нысандар, өнеркәсіп және бизнес орындары, су объектілері мен көшелердің бойы тазарып қалды.

Бүгінде облыс аумағына 10 мың түпке жуық тал отырғызылды.

Елімізде қалдықтарды жинау және қайта өңдеу кәсіпорындарын ынталандыру мақсатында «ЭкоҚолдау» бағдарламасына биыл 9,2 миллиард теңге қарастырылды.